Redaksiyaya müraciət edən ana övladının məktəbdə müəllim tərəfindən alçaldıldığını və bunun nəticəsində ciddi psixoloji sarsıntı keçirdiyini iddia edir.Şikayətçi Suraxanı rayon Dədə Qorqud qəsəbəsi ev 29-da yaşayan Ceyran Kazımova bildirir ki, himayəsində böyütdüyü oğlu Bədəlov Hacət Nemət oğlu Suraxanı rayonu Dədə Qorqud qəsəbəsində yerləşən 315 nömrəli tam orta məktəbin 8 “B” sinfində təhsil alır. Onun sözlərinə görə, məktəbin ingilis dili müəllimi Rahibə müəllimə dərs zamanı baş vermiş hadisə ilə bağlı şagirdi sinif yoldaşlarının qarşısında təhqir edib.Ananın iddiasına görə, müəllim şagirdin saqqız çeynəmək istədiyini görərək onu lövhənin qarşısına çıxarıb və saqqızı başına yapışdırmağa məcbur edib. Şikayətçi bildirir ki, övladı ağlayaraq üzr istəsə də, müəllim onun yalvarışlarına məhəl qoymayıb. Daha sonra isə saqqızın saçdan təmizlənməsinin mümkün olmaması səbəbindən saçın bir hissəsinin qayçı ilə kəsildiyi iddia edilir.Müraciətdə həmçinin qeyd olunur ki, hadisədən sonra şagirdə bu barədə evdə danışmaması üçün təzyiq göstərildiyi, digər müəllim tərəfindən isə müxtəlif təmizlik işlərinə cəlb edildiyi iddia olunur.Ananın sözlərinə görə, baş verən hadisədən sonra məktəbdə bəzi şagirdlər onun oğlunu ələ salmağa başlayıb və bu vəziyyət uşağın psixoloji durumuna ciddi mənfi təsir göstərib. Şikayətçi övladına psixoloq tərəfindən F43.1 diaqnozu qoyulduğunu, onun məktəbə getmək istəmədiyini və həyatla bağlı təhlükəli fikirlər səsləndirdiyini bildirir.Ana aidiyyəti dövlət qurumlarından məsələnin obyektiv araşdırılmasını, hadisəyə hüquqi qiymət verilməsini və övladının hüquqlarının qorunmasını xahiş edir.
Qarşı tərəfin də mövqeyini dərc etməyə hazır olduğumuzu bildiririk.