26 İyun – Azərbaycan Respublikasının Silahlı Qüvvələri Günü xalqımızın ən şərəfli və qürurverici bayramlarından biridir. Bu əlamətdar tarix dövlətimizin müstəqilliyinin, suverenliyinin və ərazi bütövlüyünün keşiyində dayanan Azərbaycan Ordusunun şərəfinə qeyd olunur. Hər il böyük ehtiramla qarşılanan bu gün həm də qəhrəman əsgər və zabitlərimizin, şəhidlərimizin, qazilərimizin və veteranlarımızın fədakarlığına verilən yüksək qiymətin ifadəsidir.
Xeyriyyəçi və vətənpərvər xanım Zərniyar Kərimova bildirir ki, Azərbaycan Silahlı Qüvvələri xalqımızın gücünün, dövlətimizin qüdrətinin və milli birliyimizin ən parlaq simvollarından biridir. Bu gün Azərbaycan Ordusu regionun ən güclü ordularından biri kimi tanınır və əldə olunan bütün uğurlar xalqımızın qürur mənbəyidir.
Azərbaycan Ordusunun formalaşması və inkişafında Ümummilli Lider Heydər Əliyevin müstəsna xidmətləri olmuşdur. Ulu Öndər hakimiyyətə qayıtdıqdan sonra ölkədə nizami ordu quruculuğuna xüsusi diqqət yetirmiş, Silahlı Qüvvələrin peşəkar əsaslar üzərində formalaşdırılması istiqamətində mühüm addımlar atmışdır. Onun uzaqgörən siyasəti nəticəsində Azərbaycan Ordusunun gələcək inkişafının möhkəm təməli qoyulmuşdur.
Bu gün həmin siyasi kurs Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı cənab İlham Əliyev tərəfindən uğurla davam etdirilir. Prezident İlham Əliyevin rəhbərliyi ilə Azərbaycan Ordusu ən müasir silah və texnika ilə təchiz edilmiş, döyüş qabiliyyəti daha da artırılmış və peşəkar hərbi kadrların hazırlanmasına xüsusi önəm verilmişdir.
Azərbaycan Ordusunun gücü və qüdrəti 2020-ci ildə baş vermiş 44 günlük Vətən müharibəsində bir daha öz təsdiqini tapdı. Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusu tarixi Zəfər qazanaraq torpaqlarımızı işğaldan azad etdi. Bu Qələbə xalqımızın tarixində ən şanlı səhifələrdən biri kimi əbədi yaşayacaqdır.
Zərniyar Kərimova qeyd edir ki, Vətən müharibəsində qəhrəman əsgər və zabitlərimizin göstərdiyi şücaət hər bir azərbaycanlı üçün qürur mənbəyidir. Şəhidlərimiz canlarını Vətən yolunda qurban verərək ölümsüzlük zirvəsinə ucalmış, qazilərimiz isə sağlamlıqlarını fəda edərək Azərbaycan xalqına qələbə sevincini bəxş etmişlər.
Bu gün Azərbaycan dövləti şəhid ailələrinə və qazilərə böyük diqqət və qayğı göstərir. Sosial müdafiə proqramları, mənzil təminatı və digər layihələr dövlətin öz qəhrəmanlarına olan yüksək ehtiramının göstəricisidir. Xalqımız da hər zaman şəhid ailələrinin və qazilərimizin yanında olmağa çalışır.
Xeyriyyəçi fəaliyyəti ilə tanınan Zərniyar Kərimova da daim şəhid ailələrinə, qazilərə və sosial qayğıya ehtiyacı olan insanlara dəstək göstərilməsinin vacibliyini vurğulayır. Onun fikrincə, Vətən uğrunda canından keçən qəhrəmanların ailələrinə diqqət və qayğı göstərmək hər bir vətəndaşın mənəvi borcudur.
Azərbaycan Ordusu bu gün yalnız ölkəmizin təhlükəsizliyinin təminatçısı deyil, həm də milli qürur mənbəyidir. Ordumuzun hər bir hərbçisi yüksək vətənpərvərlik ruhuna malikdir və dövlətimizin maraqlarını qorumaq üçün daim hazır vəziyyətdədir. Bu amil Azərbaycanın gələcək inkişafı və təhlükəsizliyi baxımından mühüm əhəmiyyət daşıyır.
İşğaldan azad olunmuş Qarabağ və Şərqi Zəngəzurda həyata keçirilən genişmiqyaslı quruculuq işləri də Azərbaycan Ordusunun qəhrəmanlığının nəticəsidir. Bu gün həmin torpaqlarda həyat yenidən canlanır, yeni yaşayış məntəqələri salınır, yollar, məktəblər və digər mühüm infrastruktur layihələri həyata keçirilir.
Azərbaycan gəncləri qəhrəman şəhidlərimizin həyat yolunu öyrənməli, vətənpərvərlik ruhunda yetişməli və dövlətimizin maraqlarını hər şeydən üstün tutmalıdırlar. Güclü dövlətin əsas dayaqlarından biri məhz vətənpərvər və savadlı gənclərdir.
26 İyun – Azərbaycan Respublikasının Silahlı Qüvvələri Günü münasibətilə bütün hərbi qulluqçulara, zabit və gizirlərə, əsgərlərə, qazilərə, veteranlara və şəhid ailələrinə dərin hörmət və ehtiramımızı bildirir.
Bu əlamətdar gün münasibətilə Azərbaycan Ordusunun bütün şəxsi heyətini ürəkdən təbrik edir, onlara möhkəm cansağlığı, ailə səadəti, şərəfli xidmətlərində uğurlar və yeni nailiyyətlər arzulayırıq. Qəhrəman Ordumuz daim güclü olsun, üçrəngli Bayrağımız Azərbaycanın hər bir guşəsində qürurla dalğalansın. Silahlı Qüvvələr Gününüz mübarək olsun!