Qlobal enerji bazarlarında kəskin bahalaşma müşahidə olunur. ABŞ-nin İrana qarşı dəniz blokadasını genişləndirə biləcəyi ilə bağlı xəbərlərdən sonra “Brent” markalı xam neftin qiyməti qısa müddətdə bir barel üçün 120 dollara çataraq, 2022-ci ildən bəri ən yüksək səviyyəni görüb.

“Qafqazinfo” xəbər verir ki, Ağ Evdə Prezident Donald Trampla enerji sektoru rəhbərləri arasında keçirilən yüksək səviyyəli görüş bazarlar tərəfindən Hörmüz boğazında mövcud blokadanın uzunmüddətli ola biləcəyinə işarə kimi qiymətləndirilib.

Görüşdə böyük enerji şirkətlərinin nümayəndələri, o cümlədən, “Chevron”un baş direktoru Mayk Virt iştirak edib. Müzakirələrdə münaqişənin ABŞ-də istehlakçılara və daxili enerji istehsalına təsirini azaltmaq yolları ön plana çıxıb.

Məlumatlara görə, Tramp administrasiyası Tehrana iqtisadi təzyiqi artırmaq məqsədilə İran limanlarına qarşı blokadanın genişləndirilməsi variantlarını nəzərdən keçirir. Buna cavab olaraq, İran tərəfi qlobal neft və təbii qaz daşımalarının mühüm hissəsinin keçdiyi Hörmüz boğazında tranzitin məhdudlaşdırılmasını davam etdirəcəyini bəyan edib.

Bildirilir ki, blokada uzandıqca qlobal enerji təchizatında ciddi pozuntular yarana bilər. Bu isə yalnız yanacaq qiymətlərinin artımı ilə məhdudlaşmayaraq, geniş məhsul qıtlığı və inflyasiya təzyiqlərini də gücləndirə bilər.

Neft qiymətləri münaqişənin başlanğıcından bəri yüksək dəyişkənlik nümayiş etdirir. Aprelin əvvəlində qısa eniş qeydə alınsa da, qiymətlər hələ də münaqişədən əvvəlki səviyyədən xeyli yuxarı qalır.

Eyni zamanda, İran iqtisadiyyatı da ciddi çətinliklərlə üzləşib. Ölkədə illik inflyasiya səviyyəsi 53,7%-ə çatıb, müharibə şəraitində isə təxminən iki milyon insan işsiz qalıb.

Dünya Bankının son proqnozuna əsasən, böhran yaxın aylarda həll olunmazsa, 2026-cı ildə qlobal enerji qiymətlərinin 24% artacağı gözlənilir. Artan qeyri-müəyyənlik fonunda Avropa fond bazarlarında da geriləmə müşahidə olunub.

ABŞ Prezidenti Donald Tramp isə danışıqların dayanmasına baxmayaraq, İrana yenidən çağırış edərək, “ağıllı davranmağa və razılaşma əldə etməyə” səsləyib.