ABŞ-nin texnologiya nəhəngi “Apple” şirkəti tərəfindən hazırlanan ilk qatlanan “iPhone” modelinin dizayn xüsusiyyətləri və təxmini qiyməti məlum olub.

“Qafqazinfo” xəbər verir ki, "Bloomberg" agentliyi bu barədə insayder Mark Qurmanın məlumatına istinad edib.

Məlumata görə, yeni cihaz “iPhone Air” modelinə bənzəyəcək və “ultranazik dizayn nailiyyəti” kimi təqdim olunacaq. Qatlanan “iPhone” iki “iPhone Air” modelinin birləşdirilmiş forması şəklində görünəcək.

Qeyd edək ki, titan korpusa malik olan “iPhone Air” smartfonunun qalınlığı cəmi 5,6 millimetrdir. Bu model yeni qatlanan smartfonun dizaynında əsas baza kimi götürüləcək. Yeni cihazın bazar qiymətinin azı 2 min dollar olacağı gözlənilir. Cihazda istifadə olunacaq qabaqcıl texnologiya sayəsində ekranın qatlanan hissəsindəki izlər minimuma endiriləcək.

İlkin məlumata əsasən, “Apple” şirkəti qatlanan “iPhone” modelini 2026-cı ilin payızında təqdim etməyi planlaşdırır. Cihazın istehsalı ənənəvi olaraq Çinin “Foxconn” zavodlarında həyata keçiriləcək.