Cənub bölgəsinin tanınmış şəxsiyyətlərinin həyat və fəaliyyətinə həsr olunmuş, böyük zəhmət və uzunmüddətli araşdırmalar nəticəsində ərsəyə gələn “Doğma elin simaları” kitabının birinci cildi işıq üzü görüb.
Kitabın müəllifi Cənubunsəsi Xəbər Portalının təsisçisi və baş redaktoru, “Liqa” qəzetinin baş redaktoru, ictimai fəal, bloger və jurnalist Mərhəmət Lələyevdir.
Mərhəmət Lələyev uzun illərdir ki, Azərbaycanın cənub bölgəsində yaşayan və müxtəlif sahələrdə fəaliyyət göstərən tanınmış şəxslərin həyat və yaradıcılığının araşdırılması, onların cəmiyyətə xidmətlərinin işıqlandırılması istiqamətində məqsədyönlü fəaliyyət göstərir. O, 2016-cı ildə təsis etdiyi “Masallının Səsi” informasiya resursunda, daha sonra fəaliyyətini genişləndirərək Cənubunsəsi Xəbər Portalında minlərlə insan haqqında məqalələr, reportajlar və müsahibələr dərc edib. Bununla yanaşı, bölgənin tanınmış simalarına həsr olunmuş çoxsaylı sənədli filmlərin müəllifi və layihə rəhbəri kimi də tanınır.
“Doğma elin simaları” kitabı müəllifin uzun illər ərzində topladığı materiallar, apardığı araşdırmalar və görüşlər əsasında hazırlanıb. Layihənin əsas məqsədi cənub bölgəsinin ictimai, siyasi, elmi, mədəni, səhiyyə, təhsil, idman və digər sahələrdə xidmətləri ilə seçilən insanlarının həyat yolunu sənədləşdirmək, onların fəaliyyətini gələcək nəsillərə çatdırmaq və bölgənin mənəvi irsinin qorunmasına töhfə verməkdir.
Ümumilikdə üç cilddən ibarət nəzərdə tutulan nəşrdə 3000-dən çox cənublu haqqında məlumatın yer alması planlaşdırılır. Artıq nəşr olunmuş birinci cilddə Lənkəran, Masallı, Lerik, Yardımlı, Biləsuvar, Astara və Cəlilabad rayonlarını təmsil edən 361 nəfər haqqında geniş bioqrafik məlumatlar, həyat və fəaliyyətlərinə dair faktlar öz əksini tapıb.
Müəllifin sözlərinə görə, hazırda ikinci və üçüncü cildlərin hazırlanması istiqamətində işlər davam etdirilir və həmin nəşrlərdə yüzlərlə yeni sima haqqında məlumatların oxuculara təqdim olunması nəzərdə tutulur.
Kitabın ərsəyə gəlməsində peşəkar redaksiya heyətinin də böyük əməyi olub.
Baş redaktor: Zakir Abbas – Əməkdar jurnalist, yazıçı-tərcüməçi
Baş məsləhətçi: Fərahim Sadıqov – Bakı Elm-Təhsil Mərkəzinin direktoru, pedaqogika elmləri doktoru, professor, akademik Yusif Məmmədəliyev mükafatı laureatı, Prezident təqaüdçüsü
Elmi məsləhətçi: Həsənbala Sadıqov – AMEA Gəncə Bölməsi Diyarşünaslıq İnstitutunun Tarix şöbəsinin müdiri, tarix elmləri doktoru, professor
Redaktor: Akif Ağayev – AJB-nin Masallı Rayon Təşkilatının sədri, yazıçı-publisist, jurnalist
Korrektor: Faiq Mirzə
Dizayn: Elsevər Əliyev
Mətnin kompüter yığımı: MirSadiq Eminov
Kitabın naşiri isə “Dodo” qəzetinin təsisçisi və baş redaktoru İradə Məlikova olub.

Qeyd edək ki, belə genişmiqyaslı layihənin həyata keçirilməsi xeyriyyəçi insanların dəstəyi sayəsində mümkün olub. “Doğma elin simaları” kitabının birinci cildi tanınmış iş adamı, xeyriyyəçi, “Masallı Electronics” şirkətinin təsisçisi Ruslan Bağışovun, eləcə də Masallı rayonunda fəaliyyət göstərən AMOR Şirniyyat və Dekor Evinin təsisçisi, iş xanımı Sədaqət xanımın maliyyə dəstəyi ilə çap olunub.
Müəllif və layihə rəhbəri Mərhəmət Lələyev kitabın nəşrinə dəstək göstərən hər kəsə təşəkkürünü bildirərək qeyd edib ki, bu nəşr yalnız bir kitab deyil, həm də cənub bölgəsinin tarixini, yaddaşını və görkəmli insanlarının həyat yolunu yaşadan mühüm ensiklopedik mənbədir. O bildirib ki, gələcəkdə layihənin daha da genişləndirilməsi, yeni cildlərin nəşri və bölgənin tanınmış simaları haqqında əlavə materialların toplanması istiqamətində işlər davam etdiriləcək.
“Doğma elin simaları” kitabının nəşri cənub bölgəsinin tarixi yaddaşının qorunması, görkəmli şəxsiyyətlərinin tanıdılması və gələcək nəsillərə çatdırılması baxımından mühüm hadisə kimi qiymətləndirilir. Bu nəşr təkcə bu günün deyil, gələcək tədqiqatçılar, tarixçilər və oxucular üçün də dəyərli mənbələrdən biri olacaq.

Doğma elin simaları kitabının müəllifi
Mərhəmət Lələyev