Ulusəstv.az xəbər verir ki, Milli Məclisin deputatı, professor, Azərbaycan tarixçisi, dövlət xadimi, Vətəndaş Həmrəyliyi Partiyasının sədr müavini Fəzail İbrahimli 22 yanvar 2026-cı il tarixində Masallı rayonunda seçicilərlə görüş və vətəndaş qəbulu keçirib.
Görüş Masallı rayonunun Təzə Alvadı inzibati ərazisinə daxil olan Əhmədli kəndində, Birinci Qarabağ müharibəsi şəhidi Məhərrəm Abuşovun adını daşıyan Əhmədli kənd orta məktəbində baş tutub. Tədbirdən öncə millət vəkili şəhidlərin məzarlarını ziyarət edib, məzarlar üzərinə gül dəstələri qoyub və məktəbdə yaradılmış şəhidlər guşəsi ilə tanış olub.
Görüş çərçivəsində Cənubunsəsi xəbər portalının təsisçisi və baş redaktoru, “Liqa” qəzetinin baş redaktoru, ictimai fəal, bloqer-jurnalist Mərhəmət Lələyev millət vəkili tərəfindən qəbul edilib. Görüş zamanı Fəzail İbrahimli Cənubunsəsi xəbər portalının obyektiv, operativ və ictimai maraqlara xidmət edən fəaliyyətini yüksək qiymətləndirdiyini, portalın bölgədə ictimai rəyin formalaşmasında mühüm rol oynadığını bildirib.
Millət vəkili xüsusi olaraq vurğulayıb ki, Cənubunsəsi portalında tanınmış ictimai-siyasi xadimlər, ziyalılar və media nümayəndələri ilə aparılan müsahibələr cəmiyyət üçün dəyərli informasiya mənbəyidir. Eyni zamanda, portalın redaksiyası tərəfindən sosial həssas ailələrə, şəhid ailələrinə və ehtiyacı olan insanlara göstərilən maddi və mənəvi yardımların təqdirəlayiq olduğunu qeyd edib. Fəzail İbrahimli bu kimi təşəbbüslərin medianın yalnız informasiya deyil, həm də sosial məsuliyyət daşıyan güc olduğunu sübut etdiyini bildirib.
Deputat əlavə edib ki, Cənubunsəsi daim xalqın problemlərini işıqlandırır, vətəndaş–dövlət münasibətlərinin möhkəmlənməsinə töhfə verir və yerli medianın inkişafında nümunəvi platformalardan biridir. Portalı hər zaman maraq və zövqlə izlədiyini deyən Fəzail İbrahimli kollektivə gələcək fəaliyyətlərində uğurlar arzulayıb.
Görüş zamanı nəşr olunan “Doğma elin simaları” kitabı ətrafında da geniş fikir mübadiləsi aparılıb, regional dəyərlərin və tarixi şəxsiyyətlərin təbliğinin vacibliyi qeyd olunub.
Mərhəmət Lələyev öz növbəsində göstərilən diqqət və səmimi münasibətə görə Fəzail İbrahimliyə təşəkkür edib.
Qəbuldan sonra millət vəkili Əhmədli və ətraf kəndlərin sakinləri ilə görüşərək onların müraciətlərini dinləyib. Qaldırılan məsələlər əsasən məşğulluq, sosial təminat, torpaq münasibətləri, təhsil, sahibkarlıq, nəqliyyat və kommunikasiya sahələrini əhatə edib.

Ulusəstv.az
Şamil Cəfərov
Fotolar Elsever Aliyev