Fransa Prezidenti Emmanuel Makron Kopenhagendə keçirilən Avropa İttifaqı sammitində Avropa Komissiyasının rəhbəri Ursula fon der Lyayenin “dronlardan müdafiə divarı” layihəsini kəskin tənqid edib.

“Qafqazinfo” xəbər verir ki, bu barədə “The Financial Times” nəşri məlumat yayıb.

Makron bəyan edib ki, “dəmir qübbə” və ya “dron divarı” kimi ümumi ifadələrə ehtiyatla yanaşmaq lazımdır.

“Avropalılar üçün dəmir qübbələr və ya dron divarları varmı? Hər şey çox daha mürəkkəb və spesifikdir”, – deyə Fransa lideri vurğulayıb.

Nəşrin məlumatına görə, Makron və digər Aİ liderləri hesab ediblər ki, U. fon der Lyayenin təşəbbüsü səsləniş baxımından cəlbedici olsa da, “tam müdafiə illüziyası” yarada bilər. Buna görə də sammitdə bu ideyaya reaksiyalar soyuq olub.

Qeyd edək ki, “dron divarı” layihəsi Almaniya, Polşa, Finlandiya və Baltik ölkələrinin birgə təşəbbüsüdür. Layihə Rusiyayla sərhəd boyunca çoxqatlı müşahidə və avtomatlaşdırılmış müdafiə sistemlərinin qurulmasını nəzərdə tutur və hazırda işlənmə mərhələsindədir.