Cənubi Avstraliyanın bəzi bölgələrində koala populyasiyasının sürətlə artması ekosistemlər üçün potensial təhlükə yaradıb və təbiəti mühafizə mütəxəssisləri arasında ciddi narahatlığa səbəb olub.

Oxu.Az xəbər verir ki, bu barədə məlumatı "The Independent" qəzeti yayıb.

Koalalar Avstraliyanın bəzi bölgələrində, xüsusən də şərq sahillərində rəsmi olaraq nəsli kəsilməkdə olan növlər siyahısına daxil edilsə də, yerli araşdırmalar onların ölkə üzrə ümumi populyasiyasının 729 minlə 918 min arasında dəyişdiyini göstərir. Ümumi sayın təxminən 10%-i Cənubi Avstraliyada yerləşən Maunt Lofti dağlarında cəmləşib.

Məlumata görə, şərqi Avstraliyanın böyük bir hissəsində koalaların sayı kəskin şəkildə azaldığı halda, Maunt Lofti dağlarında onların populyasiyası sürətlə artır. Mütəxəssislər xəbərdarlıq edirlər ki, adekvat nəzarət tədbirləri görülməzsə, Cənubi Avstraliyanın bəzi ərazilərində koala sayı növbəti 25 il ərzində daha 17-25% arta bilər.

Alimlərin hesablamalarına görə, bu artım qida ehtiyatlarına, bitki örtüyünə və bütövlükdə ekosistemlərə ciddi təzyiq göstərəcək. Koala populyasiyasına nəzarət üçün tətbiq olunan ənənəvi üsullar - kütləvi məhv etmə və ya kütləvi köçürmə - etik baxımdan narahatlıq doğurur və bu növ üçün uyğun hesab edilmir. Bu səbəbdən tədqiqatçılar doğuma nəzarət tədbirlərinin ən səmərəli və humanist həll yolu ola biləcəyi qənaətinə gəliblər.

Hesablamalara əsasən, yetkin dişi koalaların sterilizasiyasını nəzərdə tutan proqramın ümumi dəyəri 25 il ərzində təxminən 24 milyon ABŞ dolları təşkil edə bilər.