Səhər saatlarında Krit adasında zəlzələ olub.

“Qafqazinfo” xəbər verir ki, yerli vaxtla saat 06:18-də qeydə alınan yeraltı təkanların gücü 5.7 bal olaraq qiymətləndirilib.

Zəlzələ adanın müxtəlif bölgələrində hiss olunsa da, ilkin məlumatlara əsasən, tələfat və ciddi dağıntı qeydə alınmayıb.

Afina Geodinamik İnstitutunun açıqlamasına görə, zəlzələnin episentri Lasiti bölgəsində yerləşən Qudura yaşayış məntəqəsindən təxminən 23 kilometr cənub-cənub-qərbdə olub. Yeraltı təkanların ocağı 9,7 kilometr dərinlikdə yerləşib.

Avropa-Aralıq dənizi Seysmoloji Mərkəzi zəlzələnin gücünü 5.8 bal olaraq açıqlayıb.

Yerli hakimiyyət orqanları vəziyyətin nəzarət altında olduğunu bildirir və hazırda ciddi fəsadlarla bağlı hər hansı məlumatın daxil olmadığını qeyd edirlər.