“Biz İraqdan rədd olub gedirik. Bu gün ABŞ üçün qələbə günüdür”.

“Qafqazinfo” xəbər verir ki, bunu ABŞ Prezidenti Donald Tramp Milli İspan İrsi Ayı çərçivəsində Ağ Evdə çıxışı zamanı ABŞ qoşunlarının 23 ildən sonra İraqdan çıxması ilə bağlı danışarkən deyib.

“Son Amerika qüvvələrinin İraqı tərk etdiyini elan etməkdən məmnunam. Çox pis qərarlarla uzun müddət keçdi və bu, bizi əvvəlcə bataqlığa saldı. Bu, uzun illərdir ki, bizim üçün bataqlıq olub. Amma tezliklə tarixin bu fəsli başa çatacaq. Bu, Amerika üçün əla bir gündür”, - Tramp deyib.

O, İraq müharibəsinin 2003-cü ildə keçmiş Prezident Corc Buşun dövründə başladığını, daha sonra Barak Obama və Co Baydenin prezidentliyi dövründə davam etdiyini bildirib: “Onların dediyi kimi, əməliyyat 2026-cı ildə Prezident Donald Trampın dövründə başa çatır”.

Tramp bunun həm İraq, həm də İŞİD-ə qarşı mübarizə baxımından qələbə olduğunu bildirib. O, terror təşkilatının tamamilə məhv edildiyini söyləyib.

ABŞ Prezidentinin sözlərinə görə, koalisiya qüvvələrinin və avadanlıqlarının Ərbil Hava Bazasından çıxarılması uzunmüddətli hərbi iştirakın başa çatmasının son mərhələsi olub.

“Koalisiya qüvvələrinin və avadanlıqlarının Ərbil Hava Bazasından nizamlı şəkildə çıxması çox baha başa gələn bir səyahətin sonudur. Bütün avadanlıqlarımızı götürdük. Dedim ki, bir az daha uzun çəksin, amma hər şeyi götürək. Yadınızdadırsa, bütün avadanlıqları Əfqanıstanda geridə qoyduq”, - Tramp bildirib.

O, ABŞ qüvvələrinin geridə heç bir avadanlıq qoymaması barədə göstəriş verdiyini də deyib: “Yerdə bir vint varsa, onu da özünüzlə aparın, parçadan hazırlanmış çadır varsa, onu da götürün”.

“Qalmaq və ya getmək arasında seçim etməli idim və düşündüm ki, Amerikanın evə qayıtmasının vaxtıdır. İraqın Baş naziri Əli Zeydi əla adamdır. Ümid edirəm ki, o, işləri yaxşı idarə edə bilər”, - Tramp İraqdan çıxmaq qərarını izah edib.

Tramp İraq müharibəsinin ABŞ üçün ağır itkilərlə nəticələndiyini vurğulayıb: “Biz 23 il İraqda olduq, 4500-dən çox Amerika əsgərini itirdik və 31 mindən çox yaralı var idi”.