Braziliyada keçirilən prezident seçkilərində Luiz İnasio Lula da Silvaya məğlub olduqdan sonra ölkəni tərk edərək ABŞ-yə qaçan senator Flavio Bolsonaro özünü “Braziliya lideri” elan edib.

“Qafqazinfo” xəbər verir ki, Bolsonaro “X” sosial şəbəkəsində paylaşdığı, daha sonra silərək yenidən dərc etdiyi məktubda əvvəlcə özünü “əsl seçilmiş prezident” adlandırıb, sonradan isə bu ifadəni “Braziliya lideri” ilə əvəzləyib.

Məktubunda ona dəstək verən Argentina Prezidenti Xavyer Mileyə və ABŞ Prezidenti Donald Trampa təşəkkür edən Bolsonaro ABŞ-ni azadlıqlar ölkəsi adlandırıb. O, Braziliyanı tərk etməsini qaçış deyil, siyasi mübarizə strategiyası kimi təqdim edib.

“Braziliyadan qaçmadığımı, Braziliya üçün getdiyimi açıq şəkildə bildirmək istəyirəm. Xalqımın layiq olduğu lider olmaq üçün bu fövqəladə rejimi tərk etdim”, – Bolsonaro yazıb.

O, Braziliyanın mövcud hakimiyyətini və məhkəmə sistemini sərt tənqid edib, Ali Məhkəmənin hakimi Kristiano Zanini seçkilərə müdaxilədə günahlandırıb. Bolsonaronun iddiasına görə, səsvermə müddətinin iki saat uzadılması Lula da Silvanın ikinci turda 10 milyondan çox əlavə səs qazanmasına imkan verib.

Senator ölkədən ayrılmaq qərarını zərurətlə izah edib və ailəsinə, eləcə də, tərəfdarlarına qarşı siyasi təqiblərin olduğunu bildirib. O, mübarizəsini ABŞ-dən davam etdirəcəyini bildirərək, Braziliyada demokratiya, insan hüquqları və azadlıq uğrunda mübarizəsinin yeni başladığını vurğulayıb.

Bolsonaro məktubunun sonunda özünü yalnız ona səs verən 60 milyon seçicinin deyil, bütün Braziliya xalqının lideri adlandırıb və seçkiləri saxtalaşdırmaqda günahlandırdığı şəxsləri ölkədə tiranlıq qurmaqda ittiham edib.

Bolsonaronun seçkilərdə saxtakarlıqla bağlı iddialarına baxmayaraq, nəticələr Braziliyanın rəsmi qurumları, o cümlədən Ali Seçki Məhkəməsi, məhkəmə sistemi, hökumət və onun namizədliyini irəli sürən Liberal Partiya tərəfindən tanınıb.

Məlumata görə, korrupsiya və çirkli pulların yuyulması ilə bağlı araşdırmalar çərçivəsində Bolsonaronun pasportu müsadirə edilib. Buna baxmayaraq, onun səyahət qadağası qüvvədə olduğu halda ölkəni tərk etdiyi bildirilir. Braziliya Prezidenti Lula da Silva senatorun ölkədən getməsini “utancverici” adlandırıb.

Braziliyanın Federal Ali Məhkəməsi keçmiş prezident Jair Bolsonaronun həyatından bəhs edən “Qaranlıq At” bioqrafik filminin qanunsuz maliyyələşdirilməsi iddialarını araşdırır. “O Estado de S. Paulo” və “O Globo” qəzetlərinin məlumatına görə, Flavio Bolsonaro və onun yaxın çevrəsi başqa bir çirkli pulların yuyulması işi ilə bağlı da araşdırma predmetidir.

ABŞ prezidenti Donald Tramp dünən verdiyi açıqlamada Braziliya seçkilərinin nəticələrinə şübhə ilə yanaşdığını, Bolsonaro və ailəsinin ABŞ-yə girməsinə icazə verdiyini bildirib.