"Bu səfər, strateji tərəfdaşlığı daha da dərinləşdirəcək, iqtisadi və infrastruktur sahəsində yeni əməkdaşlıq imkanları yaradacaq, enerji və ekoloji problemlərin həllində ortaq addımları təmin edəcək, regional və qlobal miqyasda proseslərə müsbət təsir yaradacaq”.

Qaynarinfo-ya açıqlamasında bunu politoloq Əlimusa İbrahimov Azərbaycan Prezidenti İlham Əliyevin aprel ayında Çinə gözlənilən səfərini şərh edərkən deyib:
"Prezident İlham Əliyevin Çinə olacaq səfəri Azərbaycan və Çin arasındakı strateji tərəfdaşlığın dərinləşdirilməsi üçün mühüm bir addım kimi qiymətləndirilə bilər. Bu səfər, ölkələr arasında iqtisadi, siyasi və mədəni əməkdaşlığın daha da gücləndirilməsinə xidmət edəcək.

2024-cü ilin iyulunda Astanada keçirilən görüş nəticəsində tərəflər arasında qəbul edilən Birgə Bəyannamə münasibətləri strateji tərəfdaşlıq səviyyəsinə qaldırır. Bu sənəd, qarşılıqlı öhdəlikləri və əməkdaşlıq istiqamətlərini müəyyən edir”.

Ekspert qeyd edir ki, səfər, iki ölkə arasında siyasi dialoqu və strateji əməkdaşlığı daha da möhkəmləndirmək məqsədi daşıyır:

"Azərbaycan, Orta Dəhliz layihəsi vasitəsilə Asiya ilə Avropa arasında əlaqəni asanlaşdıran mühüm rola sahibdir. Bu təşəbbüs, infrastruktur və nəqliyyat sahəsində iki ölkə arasında sıx əməkdaşlığı stimullaşdırır. Bundan başqa, ticarət dövriyyəsinin artırılması məqsədilə Azərbaycan Çinin müxtəlif şəhərlərində ticarət evləri yaradaraq öz məhsullarını təqdim edir.

Birgə müəssisələrin və iqtisadi layihələrin araşdırılması da tərəfdaşlığın inkişafına dəstək verir. Digər tərəfdən, Azərbaycan, bərpa olunan enerji və yaşıl texnologiyalar sahəsində Çinin təcrübəsindən yararlanaraq, iqlim dəyişikliyi ilə mübarizədə ortaq addımlar atmağa hazırdır.

Bir sözlə, İlham Əliyevin Pekinə qarşıdakı səfəri, Azərbaycan-Çin münasibətlərinin hərtərəfli inkişafı üçün strateji əhəmiyyət kəsb edir.

Qeyd edək ki, Azərbaycan Prezidenti İlham Əliyev aprel ayında Çinə səfər edəcək.

Bu barədə "Azərbaycan-Çin strateji tərəfdaşlığı: Qlobal Cənubda konsolidasiya və əməkdaşlığın təşviqi” mövzusunda konfransda Çin Kommunist Partiyası Mərkəzi Komitəsinin (ÇKP MK) üzvü, ÇKP MK Beynəlxalq əlaqələr şöbəsinin müdiri Lyu Cyançao bildirib.

"Bu səfər çərçivəsində daha konkret layihələrlə bağlı qərarlar qəbul edəcəyik. Münasibətlərimizin dərinləşməsi üçün böyük potensial var”, - Lyu Cyançao deyib.

Rüfət Sultan