Azərbaycan cəmiyyətində dərin hörmət və sevgi qazanan, fəaliyyəti ilə hər kəsin rəğbətini qazanmış, xalqa xidməti həyat amalına çevirmiş şəxsiyyətlərdən biri də Azərbaycan Respublikasının Birinci vitse-prezidenti Mehriban Arif qızı Əliyevadır. Mehriban xanımın fəaliyyətində milli maraqlara sədaqət, sosial ədalətə bağlılıq, insanlara hörmət və mərhəmət prinsipləri hər zaman ön planda olub. Onun uğurlu fəaliyyəti, həyata keçirdiyi genişmiqyaslı layihələr, sadə insanlara olan diqqət və qayğısı bu gün onu Azərbaycanın ən nüfuzlu ictimai-siyasi xadimlərindən birinə çevirib.
Mehriban Əliyeva ilk gündən ölkənin ictimai həyatında fəal iştirak edib. Millət vəkili olaraq cəmiyyətin ehtiyaclarını dərindən dərk etmiş, seçiciləri ilə daim ünsiyyətdə olmuş, onların problemlərinin həllinə konkret töhfələr vermişdir. Bu yaxınlıq və səmimiyyət onun siyasi nüfuzunu daha da artırıb və insanların qəlbində dərin yer tutmasına səbəb olub. Onun fəaliyyətində sadəlik və əlçatanlıq hər zaman əsas prinsiplərdən olub.

2004-cü ildə yaradılan Heydər Əliyev Fondu Mehriban xanımın ictimai-siyasi fəaliyyətində dönüş nöqtəsinə çevrildi. Bu Fond təkcə bir təşkilat deyil, həm də Azərbaycanın sosial inkişafına təkan verən, minlərlə insanın həyatına müsbət təsir göstərən böyük bir xeyriyyə və inkişaf platformasına çevrildi. Fondun təşəbbüsü ilə ölkənin hər yerində məktəblər, xəstəxanalar, uşaq bağçaları, mədəniyyət mərkəzləri tikildi, yeniləndi, əlilliyi olan insanlara, müharibə iştirakçılarına, aztəminatlı ailələrə dəstək göstərildi. Bütün bu işlər Mehriban xanımın humanist dünyagörüşünün, xalqa bağlılığının və vətəndaş məsuliyyətinin real nəticəsidir.
Mehriban xanımın mədəniyyət sahəsində gördüyü işlər də xüsusi dəyərləndirilməlidir. Onun təşəbbüsü və dəstəyi ilə Azərbaycan muğamı, aşıq sənəti, xalçaçılıq və digər milli dəyərlər beynəlxalq aləmdə tanınıb, qorunub və təbliğ olunub. Onun dəvəti və təşəbbüsü ilə ölkəmizdə keçirilən beynəlxalq mədəniyyət tədbirləri Azərbaycanın dünyaya təqdim olunmasında mühüm rol oynayır. Mehriban xanım mədəni diplomatiyanın uğurlu daşıyıcısı kimi Azərbaycanın yumşaq gücünü daim gücləndirir.
O, həmçinin dinlərarası və millətlərarası dialoqun təşviqində mühüm addımlar atmışdır. Azərbaycanda dini və etnik azlıqlara göstərilən hörmət və qayğının formalaşmasında onun xidmətləri danılmazdır. Müxtəlif dini məbədlərin – məscidlərin, kilsələrin, sinaqoqların bərpası və qorunması işində Mehriban xanımın rolu böyükdür. Bu addımlar ölkəmizin tolerantlıq ənənələrini möhkəmləndirir və Azərbaycanın beynəlxalq nüfuzunu artırır.
2017-ci ildə Azərbaycan Respublikasının Birinci vitse-prezidenti təyin edilən Mehriban xanım Əliyeva bu vəzifədə də böyük məsuliyyət, peşəkarlıq və insanlara bağlılıq nümayiş etdirir. Onun fəaliyyəti dövlətin sosial siyasətinə güclü dəstək verir, Prezident İlham Əliyevin rəhbərliyi ilə həyata keçirilən islahatlara töhfə kimi çıxış edir. Mehriban xanımın bu vəzifədə gördüyü işlər – xüsusilə sağlamlıq, təhsil və sosial rifah sahəsindəki təşəbbüsləri cəmiyyət tərəfindən yüksək qiymətləndirilir.
Eyni zamanda, Mehriban xanım Əliyeva ailə dəyərlərinə sadiqliyi, övladlarına verdiyi tərbiyə, qadın kimi ictimai və şəxsi həyatını harmonik şəkildə balanslaşdırma bacarığı ilə də Azərbaycan qadınları üçün örnəkdir. O, güclü və eyni zamanda zərif, lider və eyni zamanda qayğıkeş, zəkalı və eyni zamanda sadə bir obrazla çıxış edir.
Əziz və hörmətli Mehriban xanım,
Sizi 26 avqust – doğum gününüz münasibətilə səmimi qəlbdən təbrik edirik. Siz mərhəməti, zəkanı və yüksək idarəçilik mədəniyyətini özündə birləşdirən, Vətənə və xalqa xidmətə həyatını həsr etmiş nadir şəxsiyyətlərdənsiniz.
Cəmiyyətimizdə yaratdığınız inam, göstərdiyiniz davamlı fəaliyyət, xalqa yaxınlığınız və hər kəsin dərdinə şərik olmağınız Sizi xalqın qəlbində xüsusi yerə sahib etmişdir. Sizin timsalınızda Azərbaycan qadını həm müdrik lider, həm qayğıkeş ana, həm də vətənpərvər insan obrazında təcəssüm edir.
Sizə möhkəm can sağlığı, xoşbəxtlik, yeni uğurlar və Vətənimiz naminə davamlı fəaliyyət arzu edirik. Qoy ömrünüzün hər günü xalqımızın rifahı və dövlətimizin qüdrəti ilə birgə işıqlansın.
Doğum gününüz mübarək olsun, Mehriban xanım!

Hazırladı: Şamil Cəfər
“Ulusestv.az”-ın rəhbəri