Azərbaycanın qəhrəman oğlu şəhid Vidadi Zalovun əziz xatirəsinə...
Tarix xalqların yaddaşı, millətlərin kimliyidir. Hər xalqın tarixində elə günlər, elə insanlar olur ki, zaman keçdikcə onların adı daha da ucalır, onların qəhrəmanlığı yeni nəsillərə örnək kimi yaşamağa davam edir. Azərbaycan xalqı üçün belə günlərdən biri, şübhəsiz, Vətən müharibəsinin qələbə ilə başa çatdığı 2020-ci ilin payız günləridir. Məhz o günlərdə igid oğullarımızın canı, qanı bahasına yazılan bu qələbə tariximizdə əbədi bir şərəf salnaməsinə çevrildi. Həmin salnamənin qəhrəmanlarından biri də Azərbaycanın mərd oğlu, şəhid Vidadi Nizami oğlu Zalovdur.
Bu gün artıq o tarixi zəfərin 5-ci il dönümünü yaşayırıq. Beş il — zaman baxımından qısa görünə bilər, lakin bu illər ərzində şəhidlərin qəhrəmanlığı, onların bizə qoyub getdiyi mənəvi irs bir əsr qədər dəyərlidir. Çünki bu illər Vidadi kimi oğulların qanı ilə suvarılmış torpaqlarımızda dirçəliş, qürur və yenidən doğuluş illəridir.
Vidadi Zalov ömrünü Vətənə həsr edənlərdən idi. Onun uşaqlıqdan böyüdüyü ailədə Vətən sevgisi, torpaq məhəbbəti, dövlətə sədaqət ən ali dəyərlər kimi aşılanmışdı. Sakit, təvazökar, lakin qeyrətli bir gənc idi. Hər kəs onu mərdliyi, dostluğa sədaqəti, insanlara hörməti ilə tanıyırdı. Lakin Vidadinin ən böyük arzusu və amalı Vətənə xidmət idi. O, bu arzunun gerçək mənasını 2020-ci ilin payızında – torpaqlarımızın azadlığı uğrunda gedən döyüşlərdə göstərdi.
O, döyüş meydanına könüllü yollanmışdı. “Torpaq uğrunda ölən varsa, Vətəndir” deyən şəhidimiz heç bir tərəddüd etmədən silaha sarıldı, ailəsindən, sevdiklərindən ayrılaraq cəbhəyə getdi. Hər kəs bilirdi ki, Vidadi kimi oğullar döyüşə qələbə üçün gedirlər – çünki onların ruhu qorxmaz, inamı sarsılmaz idi. Döyüş yoldaşları bu gün də onun haqqında danışarkən deyirlər: “Vidadi həmişə ön cəbhədə idi, qorxmazdı, bir addım da geri çəkilməzdi. O, hər kəsə ruh, inam, cəsarət verirdi”.
Qarabağın azadlığı uğrunda gedən döyüşlərdə Vidadi Zalov göstərdiyi igidliklə həm silahdaşlarının, həm də komandirlərinin dərin hörmətini qazanmışdı. O, düşmənə qarşı mübarizədə yüksək peşəkarlıq, soyuqqanlılıq və qəhrəmanlıq nümunəsi göstərmişdi. Məhz belə igid oğulların sayəsində Azərbaycan Ordusu işğal altındakı torpaqlarını azad etdi, xalqımızın 30 illik nisgili sona çatdı. Vidadi şəhid olsa da, bu torpaqlara azadlıq gətirən qələbənin simvoluna çevrildi.
Şəhidlik — insanın Vətən sevgisinin zirvəsidir. Vidadi Zalov bu zirvəyə ucalmaqla bir ömürlük şərəf qazandı. Onun həyatı qısa oldu, amma mənalı və böyük iz buraxdı. Hər kəs bilir ki, Vidadinin arzusu, mübarizəsi boşa getmədi. Bu gün işğaldan azad olunmuş torpaqlarda dalğalanan üçrəngli bayraq onun və onun kimi minlərlə şəhidimizin ruhunu rahatladır.
Şəhidin ailəsi üçün bu günlər həm qürur, həm də kədər doludur. Ata-ana üçün övlad itkisi ən böyük ağrıdır, amma Vidadinin valideynləri bu ağrını qürurla daşıyırlar. Çünki onların oğlu sadəcə bir insan yox, bir qəhrəman, bir millətin fəxrinə çevrilmiş şəxsdir. Onlar deyirlər: “Oğlumuz Vətən üçün şəhid oldu, bu bizim üçün fəxarətdir. Vidadinin ruhu bu gün azad torpaqlarımızda dolaşır, o, öz missiyasını şərəflə yerinə yetirib”.
Azərbaycan dövləti şəhidlərimizin xatirəsini hər zaman uca tutur. Bu, dövlətimizin və xalqımızın mənəvi borcudur. Şəhidlərin ailələrinə göstərilən diqqət, onlara verilən sosial və mənəvi dəstək, tikilən abidələr, yaradılan xatirə guşələri Vidadi kimi igidlərin adını əbədiyaşar edir.
Şəhidlər unudulmur, unudulmamalıdır. Çünki millətin gələcəyi keçmişinin qəhrəmanları üzərində ucalır. Gənc nəsil bu qəhrəmanlardan öyrənməlidir ki, Vətən sevdası, dövlətə sədaqət, torpağa bağlılıq nə deməkdir. Vidadi Zalovun həyatı və şəhidliyi bu mənada bir dərs, bir örnək, bir and yeridir.
Bu gün, Zəfərin 5-ci il dönümündə, biz bir daha başa düşürük ki, Azərbaycan xalqının gücü onun igid oğullarındadır. Hər bir şəhidin adı bu xalqın yaddaşına qızıl hərflərlə yazılıb. Vidadi Zalov kimi qəhrəmanlarımızın ruhu qarşısında baş əyirik və əminik ki, onların qoyduğu yol – Vətənə xidmət, dövlətə sədaqət, xalqa sevgi – gələcək nəsillərin də həyat amalına çevriləcək.
Vidadi Zalovun ruhu qarşısında bir daha dərin ehtiramla deyirik: Sənin igidliyin unudulmayacaq! Sənin qanının bahasına azad olan torpaqlar bu xalqın şərəf tarixində əbədi yaşayacaq. İllər ötür, amma sənin adın, qəhrəmanlığın və Vətən sevgisi hələ yüz illər boyu nəsillərə ilham verəcək.



Hürü Hacızadə
Yazıçı-publisist

Fərid Faiqoğlu
AJB-nin üzvü