Şəhid qəhrəmanımız, Azərbaycanın igid oğlu Vidadi Nizami oğlu Zalovun əziz xatirəsinə

Azərbaycan torpağı şəhidlərin qanı ilə yoğrulmuş müqəddəs torpaqdır. Bu torpaq, azadlıq uğrunda canını fəda edən igidlərin mərdliyi, cəsarəti və dövlətə sədaqəti ilə ucalıb. Hər bir şəhidin həyat yolu bir dastandır, bir məktəbdir, bir and yeridir. Onlardan biri də igid oğlu kimi xalqımızın qəlbində əbədi yaşayacaq şəhid gizir Vidadi Nizami oğlu Zalovdur.
Vidadi Zalov – bu ad bu gün Azərbaycanın hər bir vətənpərvər gənci üçün qürur, şərəf və əzmkarlıq rəmzidir. O, sadəcə bir hərbi qulluqçu deyildi – o, Vətənə könül vermiş, bu yolda ölümü belə gözə alan qəhrəman idi. Uşaqlıq illərindən vətənpərvər ruhda böyüyən Vidadi üçün torpağın hər qarışı müqəddəs, dövlət bayrağı ən ali dəyər idi. Onun həyat fəlsəfəsi sadə idi: “Vətən varsa, biz varıq.”
Vidadi Zalovun ailəsi onu sədaqətli, mərd, insanlara qayğıkeş və vətənini canından çox sevən biri kimi tanıyırdı. Hər kəs onun səmimiyyətini, sözündəki dürüstlüyü, əməlindəki cəsarəti görürdü. O, uşaqlıqdan hərbi formaya, əsgərliyə, vətən keşikçiliyi missiyasına maraq göstərirdi. Qəhrəman gizir Vidadi Zalov hələ gənclik illərində seçdiyi yolun ağır və şərəfli olduğunu anlayırdı. Amma o, qorxmadı. O, döyüşə gedəndə təkcə əmrə tabe deyildi – o, xalqının, şəhid babalarının ruhuna tabe idi.
Vətən uğrunda Vidadi də milyonlarla vətəndaş kimi bir an belə tərəddüd etmədi. O, düşmənə qarşı vuruşmağa, torpağı azad etməyə, haqqı bərpa etməyə hazır idi. Müharibənin ən gərgin günlərində Vidadi Zalov ön cəbhədə idi – canını vətən uğrunda sipər etmişdi. Onun döyüş yoldaşları bu gün də fəxrlə danışırlar: “Vidadi təkcə cəsur döyüşçü deyildi, həm də ruh verən, qorxmaz bir igid idi. Qanlı səngərdə belə o, ‘Biz mütləq qalib gələcəyik!’ deyə hamını ruhlandırırdı.”
Vidadi Zalovun qəhrəmanlığı Zəfər dastanının ayrılmaz səhifələrindən biridir. O, işğal altındakı torpaqlarımızın azadlığı uğrunda son nəfəsinə qədər vuruşdu. Yaralandı, amma döyüş meydanını tərk etmədi. Hər bir güllənin, hər bir addımın arxasında onun ürəyindəki vətən sevgisi dayanırdı. O, azadlıq sevdasından dönməyənlərdən idi. Onun üçün azadlıq sadəcə söz deyildi – bu, bir amal, bir həyat məqsədi idi.
Vidadi Zalov şəhidlik zirvəsinə ucalanda Azərbaycan daha bir qəhrəman oğlunu itirdi, amma eyni zamanda xalq daha bir əfsanə qazandı. Şəhidlik onun ömrünün sonu deyil, başlanğıcı oldu – ölməzlik başlanğıcı. Çünki o, canını fəda etməklə bir millətin başını ucaltdı, bir xalqın qüruruna çevrildi.
Bu gün onun adı yaşadığı yurdda, oxuduğu məktəbdə, xidmət etdiyi hərbi hissədə hörmətlə çəkilir. Onun xatirəsi həm ailəsinin, həm də bütün Azərbaycanın qəlbində yaşayır. Şəhidin valideynləri fəxrlə deyirlər: “Biz oğlumuzu vətən üçün böyütdük, o da vətən uğrunda can verdi.” Bəli, belə övladlar Azərbaycan torpağının ruhunu qoruyur, xalqın sarsılmaz iradəsini təcəssüm etdirir.
Prezident İlham Əliyevin rəhbərliyi ilə qazanılan Qələbə şəhidlərin ruhu üzərində ucalan zəfər abidəsidir. Vidadi Zalov kimi qəhrəmanların qanı ilə yazılmış bu tarix bizim gələcəyimizin təminatıdır. Bu gün Azərbaycan gəncliyi onun kimi şəhidlərin qəhrəmanlığından örnək götürür, vətənə sədaqət, dövlətə bağlılıq andını onlardan öyrənir.
Hər bir şəhidin ruhu torpağın nəfəsində, bayrağın rəngində, xalqın dua səsində yaşayır. Vidadi Zalovun ruhu da bu müqəddəs torpağın hər qarışında dolaşır. Onun şəhidliyi bizə xatırladır ki, azadlıq, müstəqillik və suverenlik sadəcə bir dövlətin deyil, bir millətin varlıq rəmzidir.
Azadlığa könül verən bu sevdadan dönən deyil... Bu sevda Vidadi Zalovun ürəyində başladı, onun qanı ilə torpağa yazıldı və indi milyonlarla azərbaycanlının qəlbində yaşayır.
Şəhidin adı unudulmayacaq, çünki onun igidliyi Azərbaycanın azad sabahının təməlindədir. O, torpaq uğrunda can verib, amma torpağın özü kimi ölməz olub.
Allah şəhid gizir Vidadi Nizami oğlu Zalova rəhmət eləsin.
Onun ruhu qarşısında baş əyir, xatirəsini dərin ehtiramla yad edirik.
O, azadlığın, mərdliyin, vətənə sədaqətin simvoludur.
Çünki azadlığa könül verən bu sevdadan dönən deyil...

Hürü Hacızadə
Yazıçı-piblisist

Fərid Faiqoğlu
AJB-nin üzvü