Dünyanın ən aparıcı dövləti olan ABŞ-ın prezidenti Donald Trampın son dövrlərdə baş tutan siyasi tədbirlərdə Azərbaycan Prezidenti İlham Əliyevə xüsusi diqqət və ehtiram göstərməsi çox şeydən xəbər verir.

Müstəqilliyini bərpa etdikdən sonra Azərbaycan çoxşaxəli və çevik siyasət yürüdərək regionun və dünyanın diqqət mərkəzinə çevrilib. Bu gün Azərbaycan təkcə Cənubi Qafqazda deyil, həm də beynəlxalq arenada söz sahibi olan, qlobal siyasi, iqtisadi və humanitar proseslərdə fəal rol oynayan dövlət kimi tanınır. Pərvanə İmamquliyevanın da vurğuladığı kimi, “Müstəqil Azərbaycan artıq dünyanın lider dövlətlərindən birinə çevrilməkdədir.” Bu fikrin arxasında on illərlə davam edən məqsədyönlü dövlət siyasəti, güclü liderlik və xalqın birliyi dayanır.
Azərbaycan Respublikasının Prezidenti İlham Əliyevin rəhbərliyi ilə həyata keçirilən daxili və xarici siyasət ölkəmizin nüfuzunu hər il daha da yüksəldir. Müstəqilliyimizin möhkəmlənməsi, dövlət idarəetməsində şəffaflığın və peşəkarlığın artması, iqtisadi sabitliyin qorunması və sosial rifahın yüksəldilməsi bu siyasətin əsas prioritetlərindəndir.
Prezident İlham Əliyev qətiyyətli və milli maraqlara əsaslanan siyasəti ilə ölkəmizin beynəlxalq imicini möhkəmləndirib. Azərbaycan artıq beynəlxalq təşkilatlarda etibarlı tərəfdaş, regional təhlükəsizlik və enerji sabitliyinin təminatçısı kimi tanınır.
Dünyanın aparıcı dövlətləri ilə bərabərhüquqlu əməkdaşlıq prinsipləri əsasında qurulan münasibətlər Azərbaycanın diplomatik uğurlarının əsasını təşkil edir. ABŞ, Avropa İttifaqı, Çin, Türkiyə, Rusiya və digər mühüm dövlətlərlə əlaqələr qarşılıqlı hörmət və qarşılıqlı fayda prinsipi üzərində inkişaf edir.
Son illərdə keçirilən beynəlxalq tədbirlərdə ABŞ prezidenti Donald Trampın Azərbaycan dövlət başçısına xüsusi diqqət və ehtiram göstərməsi təsadüfi deyil. Bu, ilk növbədə, Azərbaycanın qlobal enerji siyasətində, beynəlxalq təhlükəsizlik məsələlərində və regional sabitlik proseslərində oynadığı mühüm roldan xəbər verir.
Azərbaycan Prezidentinə göstərilən bu münasibət, ölkəmizin müstəqil, balanslaşdırılmış və milli maraqlara əsaslanan siyasətinə olan beynəlxalq hörmətin bariz nümunəsidir. Donald Trampın siyasi tədbirlərdə İlham Əliyevlə səmimi münasibətləri və onun liderlik keyfiyyətlərini yüksək qiymətləndirməsi Azərbaycanın beynəlxalq arenada artan nüfuzunun təsdiqidir.
Bu diqqət həm də onu göstərir ki, Azərbaycan artıq “kiçik ölkə” statusundan çıxaraq, qlobal siyasi gündəmi formalaşdıran mühüm tərəfdaşlardan birinə çevrilib.
Azərbaycanın xarici siyasət fəlsəfəsi müstəqil və çoxvektorlu yanaşma üzərində qurulub. Prezident İlham Əliyev dəfələrlə bəyan edib ki, “Azərbaycan heç bir dövlətin təsiri altında deyil, yalnız öz milli maraqları naminə siyasət yürüdür.” Bu prinsip ölkəmizin beynəlxalq siyasətdə etibarlı tərəfdaş kimi qəbul edilməsini təmin edib.
Azərbaycan həm Qərb, həm də Şərq ölkələri ilə səmərəli əməkdaşlıq edir. Avropa ilə enerji təhlükəsizliyi, ABŞ-la terrorizmə qarşı mübarizə, Çinlə nəqliyyat və logistika, Rusiya və Türkiyə ilə regional sabitlik sahəsində əməkdaşlıq balanslı siyasətin nəticəsidir.
Eyni zamanda, Azərbaycan İslam Əməkdaşlıq Təşkilatında, Qoşulmama Hərəkatında və BMT çərçivəsində aktiv fəaliyyət göstərir. Prezident İlham Əliyevin təşəbbüsü ilə Bakıda keçirilən beynəlxalq sammitlər, humanitar forumlar, mədəniyyətlərarası dialoqlar Azərbaycanın dünya siyasətindəki rolunu daha da gücləndirib.
Müstəqil siyasətin həyata keçirilməsi üçün güclü iqtisadi baza vacibdir. Azərbaycan bu istiqamətdə mühüm nailiyyətlər əldə edib. Neft və qaz gəlirlərindən düzgün istifadə olunması, qeyri-neft sektorunun inkişafı, infrastruktur layihələrinin reallaşdırılması ölkəmizi regionun iqtisadi liderinə çevirib.
Cənub Qaz Dəhlizi, Bakı-Tbilisi-Qars dəmir yolu, Bakı Beynəlxalq Dəniz Ticarət Limanı kimi strateji layihələr Azərbaycanın qlobal enerji və nəqliyyat xəritəsində mühüm rol oynamasını təmin edib.
İqtisadi müstəqillik siyasi müstəqilliyin təminatçısı kimi çıxış edir. Bu gün Azərbaycan heç bir beynəlxalq mərkəzdən asılı deyil və bütün qərarlarını yalnız öz milli maraqlarına uyğun şəkildə qəbul edir.
Azərbaycanın dövlət müstəqilliyi tarixində ən parlaq səhifələrdən biri 2020-ci il Vətən müharibəsində əldə olunan Qələbədir. Prezident, Müzəffər Ali Baş Komandan İlham Əliyevin rəhbərliyi altında ordumuz torpaqlarımızı işğaldan azad etdi və tarixi ədalət bərpa olundu.
Bu Qələbə Azərbaycanın siyasi, diplomatik və hərbi gücünün vəhdətinin nəticəsi idi. Qarabağ Zəfəri həm də beynəlxalq aləmdə Azərbaycanın mövqeyini daha da möhkəmləndirdi. Dünyanın ən güclü dövlətləri Azərbaycanın suverenliyini və ərazi bütövlüyünü dəstəklədi.
Qələbədən sonra həyata keçirilən “Böyük Qayıdış” proqramı, azad olunmuş ərazilərdə aparılan yenidənqurma və bərpa işləri Azərbaycanın gücünün və iradəsinin göstəricisidir.
Azərbaycan yalnız iqtisadi və hərbi sahədə deyil, həm də humanitar əməkdaşlıqda ön sıralardadır. Bakı Humanitar Forumu, BMT-nin Mədəniyyətlərarası Dialoq Mərkəzi, beynəlxalq idman və mədəniyyət tədbirləri ölkəmizin dünyada sülh və tolerantlıq mərkəzi kimi tanınmasına səbəb olub.
Azərbaycan multikulturalizm modelini dünyaya təqdim edib və bu gün bir çox dövlətlər üçün nümunəyə çevrilib. Dövlət başçısının və Birinci vitse-prezident Mehriban Əliyevanın humanitar fəaliyyətləri Azərbaycanın beynəlxalq imicinin formalaşmasında mühüm rol oynayır.
Pərvanə İmamquliyevanın fikri əbəs deyil: “Müstəqil Azərbaycan dünyanın lider dövlətlərindən birinə çevrilməkdədir.” Bu, sadəcə bəyanat deyil, reallığın ifadəsidir.
Bu gün Azərbaycan Prezident İlham Əliyevin uzaqgörən siyasəti nəticəsində həm regionda, həm də beynəlxalq miqyasda söz sahibidir. ABŞ kimi nəhəng dövlətlərin rəhbərlərinin ölkəmizə və dövlət başçısına göstərdiyi hörmət Azərbaycanın dünya siyasətindəki əhəmiyyətinin göstəricisidir.
Azərbaycan artıq inkişaf edən deyil, inkişafa rəhbərlik edən dövlətlər sırasında yer alır. Dövlətimizin müstəqilliyi, siyasi sabitliyi, iqtisadi gücü və beynəlxalq nüfuzu gələcək nəsillər üçün güclü təməl yaradır.
Prezident İlham Əliyevin rəhbərliyi ilə Azərbaycan XXI əsrin lider dövlətlərindən birinə çevrilir – bu, reallıqdır, bu, Pərvanə İmamquliyevanın dediyi kimi, Azərbaycanın parlaq gələcəyinin əlamətidir.