Zaman hər kəsi sınağa çəkir. Amma zamanın özünü tənzimləyən insanlar da var. Onlar nə təsadüfən yaranır, nə də bir günün içində formalaşır. Belə insanlar illərin zəhməti, ağrısı, məsuliyyəti və vicdan yükü ilə yetişir. Cəmiyyətin mənəvi dayaq nöqtəsinə çevrilən bu simalar varlıqları ilə nizam yaradır, var olduqları mühitə ümid, inam və sabitlik gətirirlər. Xalqın gözü ilə baxanda bu cür insanlar adətən bir adla çağırılır: “Xalqın fədakarı”.
Bu ad hər kəsə nəsib olmur. Bu ad orden deyil, diplom deyil, rəsmi qərarla verilmir. Bu ad insanın ömür boyu xalqın içində, xalq üçün yaşaması ilə qazanılır. Belə insanlardan biri də Azərbaycan Təmiz Texnologiyalar Şirkətinin və Zəngəzur Dəhlizi şirkətinin qurucusu, ictimai-sosial fəallığı, xeyriyyəçilik missiyası və vətəndaş mövqeyi ilə seçilən Səfər Cəfərəli oğlu Əlirzayevdir.
Səfər Əlirzayev 23 mart 1973-cü ildə Naxçıvan Muxtar Respublikasının Babək rayonunun Nehrəm kəndində dünyaya göz açıb. Bu torpaq təkcə coğrafi məkan deyil, həm də xarakter formalaşdıran məktəbdir. Nehrəmin zəhmətkeş insanları, halal ruzi ilə böyüyən ailələr, ailə və el dəyərlərinə bağlılıq Səfər müəllimin şəxsiyyətində dərin izlər buraxıb.
Orta təhsilini doğma kəndində başa vurduqdan sonra ali təhsilini Təfəkkür Universitetində davam etdirib, 2006-cı ildə beynəlxalq hüquq ixtisası üzrə bakalavr dərəcəsi alıb. Amma onu digərlərindən fərqləndirən təkcə diplomlar deyil. Onu fərqləndirən oxuduğunu həyata tətbiq etmək, biliyi məsuliyyətlə birləşdirmək bacarığıdır.
Səfər Əlirzayev əmək fəaliyyətinə 1992-ci ildən başlayıb. Müxtəlif sahələrdə qazandığı təcrübə ona bir həqiqəti aydın göstərib: sahibkarlıq təkcə gəlir mənbəyi deyil, cəmiyyət qarşısında məsuliyyətdir. Bu yanaşmanın məntiqi nəticəsi olaraq 2002-ci ildə “Azərbaycanın Təmiz Texnologiyaları” MMC-ni təsis edib və bu günədək şirkətə rəhbərlik edir.
Ekoloji həssaslıq, gigiyenik qaydalara ciddi riayət, nizam-intizam – bunlar onun rəhbərlik etdiyi strukturların dəyişməz prinsipləridir. Çünki o inanır ki, insan yaşadığı mühitə hörmət etmirsə, gələcək nəsillərə də borclu qalır.
Səfər Əlirzayevin fəaliyyəti Yeni Azərbaycan Partiyası ilə sıx bağlıdır. O, YAP-ın keçirdiyi tədbirlərdə sadəcə iştirakçı deyil, fəal mövqe nümayiş etdirən üzv kimi tanınır. 2003 və 2008-ci illərdə keçirilən prezident seçkilərində fəallığına görə partiya tərəfindən dəfələrlə təşəkkür alıb.
Onun mövqeyi hər zaman aydın olub: dövlətə sədaqət, Heydər Əliyev siyasi kursuna bağlılıq və Prezident İlham Əliyevin apardığı daxili və xarici siyasətə dəstək. Bu mövqe sözlə deyil, əməli fəaliyyətlə təsdiqlənib.
Səfər Əlirzayevin fəaliyyətində xüsusi yer tutan sahə şəhid ailələri və qazilərə göstərilən qayğıdır. Naxçıvan Muxtar Respublikasında onu tanımayan şəhid ailəsi demək olar ki, yoxdur. Bakı şəhərində də bu fəaliyyətini ardıcıl şəkildə davam etdirir.
44 günlük Vətən müharibəsi zamanı və sonrasında onun gördüyü işlər təkcə statistik rəqəmlərlə ölçülmür. Müdafiə Nazirliyinin Yardım Fonduna 100 min manat vəsait köçürməsi, bir qazi üçün minik avtomobili bağışlaması, Türkiyədə baş verən zəlzələ zamanı 500 min türk lirəsi yardım etməsi onun insani mövqeyinin açıq göstəricisidir.
Bu yardımlar nümayiş üçün deyil, səssiz, səmimi və vicdan borcu kimi həyata keçirilir.
Səfər Əlirzayev üçün xeyriyyəçilik ayrıca kampaniya deyil. Bu, onun həyat tərzidir. Ramazan bayramlarında Nehrəm kəndində təşkil olunan ehsan süfrələri, aztəminatlı ailələrə bayram sovqatları, təhsil almaqda çətinlik çəkən gənclərə dəstək – bütün bunlar illərdir davam edən bir yolun hissələridir.
Onu tanıyanlar yaxşı bilirlər: o, kömək edərkən insanı incitmir, əksinə, onu ayaqda saxlayır. Maddi yardımdan da önəmlisi verdiyi mənəvi dayaqdır.
Yeddi övlad atası olan Səfər Əlirzayev ailə dəyərlərinə bağlılığı ilə seçilir. O, ailəni cəmiyyətin əsası hesab edir və bu düşüncə onun bütün fəaliyyətinə sirayət edib. Qayğıkeş ata, məsuliyyətli ailə başçısı olmaq onun üçün ictimai titullardan daha önəmlidir.
Səfər Əlirzayevin qazandığı ən böyük mükafat nə orden, nə medal, nə də rəsmi tituldur. Onun ən böyük qazancı xalqın etibarıdır. İnsanlar onu öz doğması kimi qəbul edir, dar günündə qapısını döyür, sevincini onunla bölüşür.
Bu etibar təsadüfi deyil. Bu, illərin sınağından keçmiş bir ömrün nəticəsidir.
Səfər Əlirzayev zamanın yetişdirdiyi, həyatın içindən çıxmış, xalqın içində formalaşmış bir insandır. O, öz taleyini xalqının taleyi ilə birləşdirib. Vətənə xidmət etməyi şüar yox, həyat missiyası seçib.
Belə insanlar az olur. Amma olduqları yerdə zamanın özü düz axır.
Və xalq belə insanları unutmaz.

Mehri Nur