“Merhemet.tv” xəbər veririr ki, Azərbaycan Respublikasında vətəndaşın sağlamlığı Konstitusiya ilə qorunan ali dəyərdir. Lakin Bakı şəhər sakini Həmidova Gülnara Nəcməddin qızının başına gələnlər göstərir ki, bəzən bu ali dəyər estetik salonların məsuliyyətsizliyi, daha sonra isə hüquqi biganəlik fonunda ciddi təhlükə altına düşür.
Məsələ Nərimanov rayonunda yerləşən estetik gözəllik salonunda kosmetoloq İbrahimova Esmira Dənizxan qızının qeyri-peşəkar müdaxiləsi nəticəsində bir vətəndaşın sağlamlığına real ziyan vurulması iddiası ilə başlayır. Zərərçəkən vəziyyətin ağırlığını nəzərə alaraq hüquq-mühafizə orqanlarına müraciət edir. Cəmiyyət belə hallarda obyektiv araşdırma və qanunun işləməsini gözləyir. Ancaq nəticə gözləntilərlə tam ziddiyyət təşkil edir.
Nərimanov Rayon Prokurorunun böyük köməkçisi, kiçik ədliyyə müşaviri Hüseynov Hamlet İmran oğlu tərəfindən aparılan araşdırma 22 may 2025-ci il tarixdə “cinayət işi başlanmasının rədd edilməsi haqqında” qərarla yekunlaşdırılır. Qərarda bildirilir ki, guya hər hansı cinayət hadisəsi müəyyən edilməyib.
Ən narahatedici məqam isə qərarın əsaslandırılmasıdır. Sənəddə göstərilir ki, zərərçəkən Gülnara Həmidova əvvəlki müraciətini “əsəbi halda” yazıb, məsələni “anlaşılmazlıq” kimi qiymətləndirib və hazırda kosmetoloq barəsində heç bir şikayətinin olmadığını bildirib. Hətta gələcəkdə də olmayacağını qeyd edib.
Lakin Gülnara Həmidova bu iddiaları qətiyyətlə təkzib edir və açıq şəkildə bildirir: o, belə bir izahat verməyib.
Onun sözlərinə görə, səhhətinin son dərəcə ağır olduğu, faktiki olaraq özünü idarə edə bilmədiyi bir zamanda bu vəziyyətdən sui-istifadə edilib. Oxuya bilmədiyi, məzmunundan xəbərsiz olduğu sənədə imza atdırılıb və sonradan bu “izahat” onun iradəsi kimi təqdim olunub. Bu artıq sadəcə araşdırma səhlənkarlığı deyil, prosessual etikaya və vətəndaşın fundamental hüquqlarına açıq hörmətsizlikdir.
Əgər bir vətəndaşın adı ilə onun demədiyi sözlər rəsmiləşdirilirsə, bu, artıq cinayət hadisəsinin olub-olmamasından daha ciddi suallar doğurur: araşdırma obyektiv aparılıbmı, yoxsa məsələ süni şəkildə ört-basdır edilir?
Gülnara Həmidova bildirir ki, məhz kosmetoloqun qeyri-peşəkarlığı nəticəsində səhhəti ağır vəziyyətə düşüb və bu faktın üstündən sükutla keçilməsi yolverilməzdir. Estetik xidmət adı altında insanların sağlamlığı ilə eksperiment aparılması, ardınca isə hüquqi mexanizmlərin susdurulması cəmiyyət üçün təhlükəli presedent yaradır.
Cinayət Prosessual Məcəlləsinin 212.3-cü maddəsi açıq şəkildə deyir: cinayət işinin başlanmasının rədd edilməsi barədə qərardan yuxarı prokurora və ya məhkəməyə şikayət verilə bilər. Bu hüquqdan istifadə edən Gülnara Həmidova Azərbaycan Respublikasının Baş Prokuroru cənab Kamran Əliyevə müraciət edərək Nərimanov Rayon Prokurorluğunda qəbul edilmiş 22 may 2025-ci il tarixli qərarın ləğv olunmasını tələb edir.
Müraciətdə işin başqa prokuror köməkçisinə və ya müstəntiqə verilməsi, təkrar və qərəzsiz komisyon məhkəmə-tibbi ekspertizasının təyin edilməsi, eləcə də kosmetoloq İbrahimova Esmira Dənizxan qızının əməllərində cinayət tərkibinin olub-olmamasına real hüquqi qiymət verilməsi tələb olunur.
Bu hadisə təkcə bir qadının sağlamlığı ilə bağlı məsələ deyil. Bu, estetik sektorun nəzarətsizliyi, araşdırmaların formal aparılması və zərərçəkənlərin səsinin boğulması ilə bağlı ciddi ictimai problemdir. İndi top hüquq-mühafizə orqanlarının meydanındadır. Cəmiyyət isə haqlı olaraq soruşur: ədalət işləyəcəkmi, yoxsa bu iş də susdurulan dosyelər siyahısına əlavə olunacaq?
Qarşı tərəflərin mövqeyini tanıyırıq.

APA TV-nin video sujetlərini təqdim edirik:

[media=https://www.youtube.com/live/aeTQopEc17o]