Ulusestv.az xəbər verir ki, 14 fevral 2026-cı il tarixində Haqq Ədalət Partiyasının (HƏP) İdarə Heyətinin növbəti iclası keçirilib. İclasın gündəliyinə təşkilati məsələlər daxil edilib və bir sıra mühüm qərarlar qəbul olunub.
Gündəlikdə duran birinci məsələ HƏP Səlyan Rayon Təşkilatının yeni sədrinin təsdiqi olub. Məsələ ilə bağlı məruzə ilə çıxış edən HƏP Mərkəzi İcra Aparatının rəhbəri Rəşad Məhəmmədov və HƏP Naxçıvan MR Regional Mərkəzi rəhbərinin birinci müavini, HƏP Hüquq şöbəsinin rəhbəri Yusif Allahyarov namizəd kimi İlkin Səməndərovun irəli sürüldüyünü bildiriblər.

Məruzəçilər İlkin Səməndərovun yüksək ixtisasa malik, geniş siyasi biliklərə sahib, təşkilatçılıq təcrübəsi qazanmış və Səlyan rayonunda əhali arasında nüfuza malik şəxs olduğunu vurğulayıblar. Çıxışlardan sonra İdarə Heyəti üzvləri tərəfindən sual-cavab və müzakirələr aparılıb.
Müzakirələrin yekununda səsvermə keçirilib və İlkin Səməndərov yekdilliklə HƏP Səlyan Rayon Təşkilatının sədri vəzifəsinə təsdiq olunub.
Gündəlikdəki ikinci məsələ HƏP Qadınlar Şurasının Məclis üzvünün təsdiqi ilə bağlı olub. Məsələ barədə çıxış edən HƏP İdarə Heyətinin üzvü, HƏP Qadınlar Şurasının sədri Bela Davudova və HƏP İdarə Heyətinin üzvü, HƏP Ağsaqqallar Şurasının sədri Eyvaz Əliyev namizəd Arifə xanım Qasımovanın tərcümeyi-halı və əmək fəaliyyəti haqqında ətraflı məlumat veriblər.
Qeyd olunub ki, Arifə xanım Qasımova Azərbaycan Jurnalistlər İttifaqının üzvüdür və respublikanın regionları üzrə müxbir kimi fəaliyyət göstərir. Çıxış edənlər onun tanınmış ziyalı olması, siyasi proseslərə dərindən maraq göstərməsi, təşkilati məsələlərdə fəallığı və geniş biliklərə malik olması kimi keyfiyyətlərini xüsusi vurğulayıblar.
Aparılan müzakirələr və səsvermə nəticəsində Arifə xanım Qasımova yekdilliklə HƏP Qadınlar Şurasının Məclis üzvü vəzifəsinə təsdiq edilib.
İclasın üçüncü məsələsi HƏP Gənclər Birliyinin Məclis üzvünün təsdiqi ilə bağlı olub. Məsələ ilə bağlı məruzə ilə çıxış edən HƏP İdarə Heyətinin üzvü, HƏP Gənclər Birliyinin sədri, doktorant Əkbər Cəfərov 19 yaşlı Lalə xanım Zakirovanın namizədliyini irəli sürüb.
Bildirilib ki, Lalə xanım Zakirova hazırda Atatürk Universitetinin Beynəlxalq Münasibətlər ixtisası üzrə II kurs tələbəsidir. Müzakirələr zamanı onun siyasi biliklərə malik, hazırlıqlı və partiya fəaliyyətində iştirak etməyə tam hazır olan vətənpərvər bir gənc olduğu qeyd edilib.
İdarə Heyəti təqdim olunan məlumatları və səsləndirilən müsbət rəyləri nəzərə alaraq Lalə xanım Zakirovanı HƏP Gənclər Birliyi Məclis üzvü vəzifəsinə təsdiq edib.
Həmkarımız AJB-nin üzvü Arifə xanım Qasımovanı HƏP Qadınlar Şurasının Məclis üzvü vəzifəsinə, Lalə xanım Zakirovanı isə HƏP Gənclər Birliyi Məclis üzvü vəzifəsinə təyin olunmaları münasibətilə səmimi qəlbdən təbrik edir, onlara gələcək fəaliyyətlərində uğurlar arzulayırıq. İnanırıq ki, hər iki xanım partiyanın məqsəd və prinsiplərinə sadiq qalaraq, ictimai-siyasi fəaliyyətə öz layiqli töhfələrini verəcəklər.


Şamil Cəfər
AYB və AJB-nin üzvü