Ağstafa rayonunda sahibkar susuzluqdan gileylənir – Suvarma ilə bağlı səsləndirilən iddialar araşdırılmalıdır

Ağstafa rayonunun Həsənsu kənd sakini, sahibkarlıq fəaliyyəti ilə məşğul olan Vəlizadə Səfər Vəkil oğlu redaksiyamıza video müraciət ünvanlayaraq suvarma problemləri ilə bağlı ciddi iddialar səsləndirib. Onun sözlərinə görə, qarşılaşdığı maneələr nəticəsində özünə məxsus və icarəyə götürdüyü ümumilikdə 12 hektara yaxın əkin sahəsində becərdiyi yonca və taxıl susuzluqdan ciddi zərər görüb, məhsuldarlıq isə minimum səviyyəyə enib.
Şikayətçinin iddiasına əsasən, Ağstafa Suvarma Sistemləri İdarəsinin Həsənsu kəndi üzrə fəaliyyət göstərən əməkdaşı kimi təqdim etdiyi Mustafayev Arif Mirzağa oğlu hər hektar torpaq sahəsinin suvarılmasına görə ondan 30 manat ödəniş tələb edib. Vəlizadə Səfər bildirir ki, maddi imkanlarının məhdud olması səbəbindən hər hektara görə 20 manat ödəməyi təklif etsə də, tərəflər arasında razılıq əldə olunmayıb. Onun sözlərinə görə, bundan sonra əkin sahələri vaxtında su ilə təmin edilməyib və nəticədə məhsul ciddi zərər görüb.
Sahibkarın sözlərinə görə, vəziyyət onun iqtisadi durumunu daha da ağırlaşdırıb. O bildirir ki, icarəyə götürdüyü torpaq sahələrinin sahibləri artıq icarə haqlarını tələb edirlər, lakin məhsul əldə edə bilmədiyi üçün bu öhdəlikləri yerinə yetirməkdə çətinlik çəkir. Şikayətçi çıxılmaz vəziyyətdə qaldığını bildirərək redaksiyamız vasitəsilə aidiyyəti dövlət qurumlarına və ölkə başçısına müraciət edib, məsələnin obyektiv araşdırılmasını və ona köməklik göstərilməsini xahiş edir.
Su təsərrüfatı kənd təsərrüfatının əsas dayaqlarından biridir. Xüsusilə yay mövsümündə suvarmanın vaxtında həyata keçirilməsi məhsuldarlığa birbaşa təsir göstərir. Əgər sahibkarın səsləndirdiyi iddialar öz təsdiqini taparsa, bu, təkcə bir fermerin deyil, bütövlükdə kənd təsərrüfatı sektorunun inkişafına mənfi təsir göstərə biləcək ciddi məsələ kimi qiymətləndirilməlidir.
Digər tərəfdən, bu cür iddiaların hüquqi müstəvidə araşdırılması vacibdir. Dövlət qurumlarının vəzifəsi vətəndaş müraciətlərini operativ araşdırmaq, faktlar təsdiqləndiyi halda qanunvericiliyə uyğun tədbirlər görmək, əsassız olduğu müəyyən edilərsə isə bunu ictimaiyyətə aydın şəkildə izah etməkdir. Bu yanaşma həm vətəndaşların dövlətə inamını möhkəmləndirir, həm də şəffaflığın təmin olunmasına xidmət edir.
Fermerlərin və sahibkarların qarşılaşdıqları problemlərin vaxtında həll edilməsi ərzaq təhlükəsizliyi və kənd təsərrüfatının dayanıqlı inkişafı baxımından mühüm əhəmiyyət daşıyır. Suvarma sistemlərinin səmərəli fəaliyyəti, xidmətlərin qanunvericiliyə uyğun təşkili və vətəndaş məmnunluğunun təmin edilməsi aidiyyəti qurumların əsas vəzifələrindən biridir.
Redaksiyamız Vəlizadə Səfər Vəkil oğlunun səsləndirdiyi iddiaların obyektiv araşdırılmasının vacibliyini diqqətə çatdırır və qeyd edir ki, yazıda adı çəkilən şəxslərin və aidiyyəti qurumun mövqeyini dərc etməyə hazırdır. Qarşı tərəfin cavab və izah hüququ tam şəkildə tanınır. Araşdırmanın nəticələri və rəsmi mövqe daxil olduğu təqdirdə, həmin məlumatlar da ictimaiyyətə olduğu kimi təqdim ediləcək.

Uğuryolu.az