“Müəllimlərin peşə sağlamlığı: risklər, profilaktika və erkən diaqnostika” mövzusunda keçirilən seminarda müəllimlərin gündəlik iş rejiminin səs, dayaq-hərəkət sistemi və damar sağlamlığına təsiri diqqət mərkəzində olub.
Tədbirdə Olimp Hospitalın mütəxəssisləri - LOR həkimi, üz-çənə cərrahı Qəhrəman Qəhrəmanov, travmatoloq-ortoped Nicat Səttarov və fleboloq-damar cərrahı, tibb üzrə fəlsəfə doktoru İsmayıl Əsgərov çıxış ediblər.
Həkimlər müəllimlərin peşə fəaliyyəti zamanı qarşılaşdıqları sağlamlıq problemləri, onların yaranma səbəbləri və profilaktikası barədə məlumat veriblər. Çıxışlarda səsin intensiv istifadəsi nəticəsində yaranan problemlər, oturaq həyat tərzinin və ayaqüstə işləməyin dayaq-hərəkət sisteminə təsiri, bel, boyun və oynaq ağrıları, eləcə də venoz qan dövranı pozuntuları və varikoz xəstəliyinin əlamətləri müzakirə olunub.
Seminar interaktiv formatda davam edib. Müəllimlər həkimlərə suallar ünvanlayıb, gündəlik iş həyatında qarşılaşdıqları sağlamlıq problemləri ilə bağlı müzakirələr aparıb və profilaktik tədbirlərin tətbiqi ilə bağlı mütəxəssislərin tövsiyələrini dinləyiblər.
Tədbir çərçivəsində müəllimlər üçün ödənişsiz profilaktik tibbi müayinələr də keçirilib. Müayinələr sağlamlıq vəziyyətinin qiymətləndirilməsi və mümkün problemlərin erkən mərhələdə aşkarlanmasının əhəmiyyətinə diqqət çəkmək məqsədi daşıyıb.
Olimp Hospital və Azərbaycan Gənc Müəllimlər Assosiasiyasının birgə təşkil etdiyi təşəbbüs müəllimlərin sağlamlığının qorunmasına dəstək verməklə yanaşı, peşə sağlamlığı sahəsində tibbi maarifləndirmənin və profilaktik yanaşmanın təşviqinə töhfə verib.
Olimp Hospital – Dərsimiz sağlamlıqdır!

Xezertv.info