Nəsimi rayonunda 15 İyun - Milli Qurtuluş Günü ilə əlaqədar videomüşavirə keçirilib.
Ulusestv.Az “Qafqazinfo”ya istinadən xəbər verir ki, rayonun idarə, müəssisə, təşkilat rəhbərlərinin, qeyri hökümət təşkilatlarının, rayonun fəal gənclərinin və ictimaiyyət nümayəndələrinin iştirakı ilə keçirilən videomüşavirəni RİH başçısı Asif Əsgərov açaraq müşavirə iştirakçılarını 15 İyun - Milli Qurtuluş Günü münasibəti ilə təbrik edib
15 İyun - Milli Qurtuluş Gününün müstəqil Azərbaycanımızın tarixindəki mühüm əhəmiyyətini xüsusi vurğulayan A.Əsgərov 1993-cü ilin iyun ayında Azərbaycanda yaranmış kəskin ictimai – siyasi vəziyyət və kriminal şəraitin ölkəni iflic vəziyyətə salmasından danışaraq, həmin dövrdə vəziyyətin son dərəcədə təhlükəli xarakter aldığını, ciddi siyasi hakimiyyət böhranının yarandığını, ölkənin fəlakət qarşısında qaldığını bildirib. Qeyd olunub ki, həmin dövrdə Heydər Əliyev kimi qətiyyətli, dünya miqyasında tanınan və xalqı öz arxasınca aparmağa qadir olan lider hakimiyyətə gəlməsəydi hadisələr olduqca təhlükəli və gərgin bir məcrada davam edə bilərdi.
Daha sonra çıxış edənlər – 54 saylı tam orta məktəbin direktoru Sahibə Abbasova, 42 saylı tam orta məktəbin direktoru Firəngiz Həmidova və digərləri qeyd ediblər ki, Ümummilli lider Heydər Əliyevin yenidən siyasi hakimiyyətə qayıdışı ilə qısa müddətdə ölkədə baş verən vətəndaş qarşıdurması aradan qaldırıldı və cəmiyyətin həyatının bütün sahələrini əhatə edən islahatlar uğurla həyata keçirildi. Bildirildi ki, xalqımızın müstəqillik tarixində müstəsna yeri olan 15 İyun - Milli Qurtuluş Günü ilə ölkəmizin həyatında yeni dövr başlanmış, dövlətçiliyimizin möhkəmlənməsi, müstəqilliyimizin dönməz və əbədi olması üçün mühüm və səmərəli fəaliyyətin əsası qoyulub.