Azərbaycanın dövlətçilik tarixində əvəzsiz xidmətləri ilə seçilən Ulu Öndər Heydər Əliyev adı xalqımızın yaddaşında müdriklik, qətiyyət və xilaskarlıq simvolu kimi yaşayır. Bu gün Azərbaycan Avrasiyanın siyasi, iqtisadi və mədəni mərkəzlərindən birinə çevrilmişsə, bu, ilk növbədə dahi şəxsiyyət Heydər Əliyevin həyata keçirdiyi uzaqgörən siyasətin bəhrəsidir. AAYDA-nın məsul şəxsi Mehman Qəhrəmanovun “Ulu Öndər Heydər Əliyev müasir Azərbaycanın qurucusu və banisidir” sözləri də məhz bu böyük həqiqətə söykənir. Çünki bugünkü qüdrətli Azərbaycan Heydər Əliyevin əsəri, onun prinsipləri və ideyaları üzərində möhkəm şəkildə inkişaf edir.
Ulu Öndər Heydər Əliyev Azərbaycanın milli dövlətçilik tarixində dönüş yaratmış liderdir. O, hələ Sovet dövründə respublikanın iqtisadi və sosial həyatında misilsiz nailiyyətlərin əldə edilməsinə nail olmuşdu. Azərbaycan həmin illərdə ittifaqın qabaqcıl respublikalarından birinə çevrilmiş, sənaye, kənd təsərrüfatı, elm, təhsil və mədəniyyət sahələrində böyük yüksəliş baş vermişdi. Heydər Əliyev Azərbaycana rəhbərlik etdiyi dövrdə milli kadrların formalaşdırılmasına, intellektual potensialın artırılmasına xüsusi önəm verirdi. Onun uzaqgörənliyi nəticəsində Azərbaycan gələcəyin müasir dövlətçilik modelinin bünövrəsini hələ o zamanlarda qurmuşdu.
1990-cı illərin əvvəlində müstəqilliyini yenicə bərpa etmiş Azərbaycan ağır sınaqlarla üz-üzə qalmışdı. Xaos, idarəetmə böhranı, iqtisadi çöküş və Ermənistanın hərbi təcavüzü ölkəni uçuruma sürükləyirdi. Məhz belə bir kobud və təhlükəli dövrdə xalqın təkidli tələbi ilə Heydər Əliyev siyasi səhnəyə qayıdaraq Azərbaycanın müstəqilliyini xilas etdi. Onun qətiyyətli iradəsi, böyük dövlətçilik təcrübəsi və müdrik siyasəti Azərbaycanı parçalanmaq təhlükəsindən xilas etdi və ölkəni sabit, inkişaf edən dövlət yoluna çıxardı.
Heydər Əliyevin ölkədə siyasi sabitlik yaratması, hüquqi dövlət quruculuğuna başlaması, demokratik institutların formalaşması üçün əsasların qoyulması Azərbaycan tarixinin ən mühüm mərhələlərindən biridir. Onun səyləri nəticəsində dövlətçiliyin rəhni möhkəmləndi, ordunun formalaşdırılması prosesi sürətləndi, Ermənistanın təcavüzünə qarşı güclü müdafiə sistemi yaradıldı. Ulu Öndərin imzaladığı “Əsrin müqaviləsi” Azərbaycanın iqtisadi gələcəyini köklü şəkildə dəyişərək ölkəni regionun enerji mərkəzinə çevirdi. Bu müqavilə ölkənin inkişaf strategiyasının təməl daşlarından biri kimi Azərbaycanın qlobal miqyasda nüfuzunu artırdı.
Mehman Qəhrəmanovun sözlərində qeyd olunduğu kimi, Heydər Əliyevin müasir Azərbaycan dövlətinin banisi olması təkcə siyasi deyil, həm də ideoloji anlam daşıyır. Çünki Ulu Öndər yalnız dövlət qurmadı, həm də bu dövlət üçün ideya formalaşdırdı — dövlətçilik konsepsiyası, daxili və xarici siyasətdə milli maraqları əsas götürən strategiya, güclü ordu və möhkəm iqtisadiyyat modeli onun siyasi irsinin əsasını təşkil edir. Bu gün Azərbaycan Prezidenti İlham Əliyevin rəhbərliyi ilə reallaşdırılan uğurlu kurs da məhz Heydər Əliyevin ideyalarının məntiqi davamıdır.
Heydər Əliyev daim xalqı ilə yaşayan lider idi. Onun siyasətinin əsasında insan amili dayanırdı. Xalqın rifahını, təhlükəsizliyini və dövlətin suverenliyini hər şeydən üstün tutan Ulu Öndər, ölkənin regionlarının inkişafı, sosial təminatın gücləndirilməsi və əhalinin sosial müdafiəsinin yaxşılaşdırılması istiqamətində mühüm qərarlar qəbul etmişdi. Bu gün ölkədə reallaşan bütün sosial-iqtisadi layihələrin kökündə Heydər Əliyevin müəyyən etdiyi strateji xətt dayanır.
AAYDA əməkdaşları o cümlədən Mehman Qəhrəmanov dəfələrlə qeyd edib ki, Ulu Öndərin respublikanın hər bir sahəsinə göstərdiyi diqqət bu gün də öz real nəticələrini verir. Yol-nəqliyyat infrastrukturunun yenilənməsi, müasir magistral yolların tikilməsi, regionların sosial-iqtisadi inkişafının sürətlənməsi — bütün bunlar Heydər Əliyevin vaxtilə müəyyənləşdirdiyi inkişaf konsepsiyasının davamıdır. Məhz onun müəyyən etdiyi strateji yol xəritəsi Azərbaycanda nəqliyyat-kommunikasiya sektorunu regional və beynəlxalq layihələrin mühüm iştirakçısına çevirib.
Ulu Öndərin adı bu gün də Azərbaycanın hər bir uğurunun təməlində dayanır. Onun dövlət idarəçiliyi məktəbi yalnız tarixi deyil, həm də praktik əhəmiyyət daşıyır. Bu məktəb peşəkarlıq, məsuliyyət, xalqa xidmət prinsiplərinə əsaslanır. Heydər Əliyevin fəaliyyətinin mərkəzində duran şəffaflıq, dürüstlük, xalqla bağlılıq kimi dəyərlər bu gün də dövlət idarəçiliyinin əsas prinsipləri kimi qəbul olunur. Mehman Qəhrəmanovun vurğuladığı kimi, Heydər Əliyev yaratdığı məktəb və qoyduğu irs ilə müasir Azərbaycanın banisi olmaqla yanaşı, gələcək nəsillər üçün də əvəzsiz yol xəritəsi qoyub.
Ulu Öndərin Azərbaycanı dünyada tanıtdırmaq, onun müstəqil siyasətini qəbul etdirmək istiqamətində apardığı diplomatik fəaliyyət də xüsusi qeyd olunmalıdır. Onun yüksək diplomatik bacarığı nəticəsində Azərbaycan qısa müddətdə beynəlxalq arenada tanınan, hörmət edilən və regional təhlükəsizlikdə mühüm rol oynayan dövlətə çevrildi. Bu gün Azərbaycanın dünya miqyasında artan nüfuzu məhz Heydər Əliyevin təməlini qoyduğu siyasi kursun uğurla davam etdirilməsinin nəticəsidir.
Heydər Əliyevin ölkəyə qaytarıdığı sabitlik, inkişaf və güvən xalqımız üçün əvəzolunmaz dəyərdir. Bu gün onun əziz xatirəsi hər bir azərbaycanlının qəlbində yaşayır, onun ideyaları isə inkişafımızın mayakı olaraq dövlətimizi daha da irəli aparır. Ulu Öndər Azərbaycan tarixində sadəcə lider deyil, həm də xilaskar, qurucu və banidir. Mehman Qəhrəmanovun sözləri də bu həqiqətin ən gözəl ifadəsidir: “Ulu Öndər Heydər Əliyev müasir Azərbaycanın qurucusu və banisidir.”
Bu gün biz müasir, güclü və dinamik inkişaf edən bir ölkədə yaşayırıqsa, bu, Heydər Əliyevin misilsiz xidmətlərinin nəticəsidir. Onun müdrikliyi, qətiyyəti və dövlətçiliyə bağlılığı Azərbaycanı daim irəli aparan əsas mənəvi dayaqlardandır. Ulu Öndərin əziz xatirəsi xalqımızın qəlbində əbədi yaşayacaq, onun müəyyən etdiyi inkişaf yolu isə Azərbaycanın gələcək parlaq uğurlarının təminatçısı olacaq.

Şamil Cəfər
AYB və AJB-nin üzvü