Azərbaycan Respublikasının Gənclər Fondunun 13- cü qrant müsabiqəsinin qalibi, gənc fəal Fatma Qurbanovanın “Gənc müəllimlər arasında qeyri-formal təhsil və innovativ tədris metodlarının təbliği” layihəsi çərçivəsində Tovuz şəhəri və rayonun ətraf kəndlərində fəaliyyət göstərən gənc müəllimlər üçün Tovuz Gənclər Evində 15 və 16 fevral 2020- ci il tarixlərində iki günlük təlim proqramı həyata keçirilib.
Təlimdə xüsusi müraciət forması əsasına seçilmiş 25 nəfər gənc iştirak etmişdir.
Layihənin rəhbəri Fatma Qurbanova tədbiri giriş sözü ilə açaraq qeyd edib ki, layihənin həyata keçirilməsində əsas məqsəd, gənc müəllimlərə formal təhsil sistemində, qeyri- formal təhsil sistemi metodlarının tətbiq edilməsinin mümkün aspektlərini nümayiş etdirmək, həmçinin, bu sahədə nəzəri və praktiki biliklər əldə etmələrini təmin etməkdir.
Sonra Tovuz Gənclər Evinin direktoru Rauf Rüstəmov çıxış edərək, ölkədə həyata keçirilən dövlət gənclər siyasəti haqqında fikirlərini iştirakçılarla bölüşüb. Gənc müəllimlərin cari təhsil sistemindəki önəmli rolundan və bunun gətirəcəyi üstünlüklərdən söhbət açıb.
Daha sonra 10 ildən artıq təcrübəyə malik karyera məsləhətçisi, təlimçi və kouç Toğrul Ələkbərov təlimin 1- ci və 2- ci günü "Formal və qeyri- formal təhsil metodlarının fərqi", "Qeyri- formal təhsilin təməl prinsipləri və tətbiqi", "Təhsil sistemi və əmək bazarı", "Şagirdlərin dərsə olan marağının artırılması", "Dərs prosesinin effektiv idarə edilməsi", "İnnovativ tədris metodları ilə tanışlıq", "İnnovativ tədris metodlarının üstünlüyü" kimi mövzularda təlim iştirakçılarını məlumatlandırıb, iştirakçılara uğurlu nümunələr göstərib və qrup işlərini təşkil edib.
Tədbirin sonunda təlimin qiymətləndirilməsi aparılıb, iştirakçılardan Orxan Əhmədov, Səhər İmamverdiyeva, Azər Babayev, Türkanə Alıyeva və digər gənclər təlimi yüksək qiymətləndirib, layihənin həyata keçirilməsinin gənclər üçün çox vacib olduğunu dilə gətiriblər. Belə bir layihənin icrası üçün Azərbaycan Gənclər Fonduna, layihə rəhbəri və təlimçiyə təşəkkürlərini bildiriblər.
Yekunda iştirakçılara sertifikatlar təqdim edilib və üzərində AzGF loqosu və layihənin adı yazılmış USB yaddaş kartları hədiyyə edilib.
Layihə Azərbaycan Respublikası Gənclər Fondunun maliyyə dəstəyi ilə həyata keçirilib.
İlkin Dadaşzadə