“Xezertv.info” xəbər verir ki, noyabrın 29-da Vətən müharibəsi şəhidi Kazımov Vüsal Kamran oğlunun anım günündə Yuxarı Nüvədi kənd tam orta məktəbində şəhid Vüsal Kazımovun əziz xatirəsinə həsr olunan “Qarabağ Azərbaycandır” adlı tədbir keçirilib. Tədbirdə Lənkəran Şəhər İcra Hakimiyyətinin (ŞİH) başçısı Taleh Qaraşov, millət vəkilləri Anar İsgəndərov və Elçin Mirzəbəyli, Lənkəran-Astara Regional Təhsil İdarəsinin müdir müavini Rəhim Rəhimov, Bakı Dövlət Universiteti və Bakı Mühəndislik Universitetinin professoru Şikar Qasımov, Azərbaycan Gənc Alim, Doktorant və Magistrlər Cəmiyyətinin sədri İlqar Orucov, şəhid ailələrinin üzvləri, Vətən müharibəsi əlilləri və müharibə iştirakçıları, habelə ictimaiyyətin nümayəndələri iştirak ediblər.
Tədbirin rəsmi hissəsi şəhidlərimizin xatirəsinin bir dəqiqəlik sükutla yad olunması və Dövlət Himninin səsləndirilməsi ilə başlayıb.
Lənkəran ŞİH başçısı Taleh Qaraşov bildirib ki, Azərbaycan dövləti şəhid ailələrinə və müharibə əlillərinə göstərilən qayğını özünün əsas prioritetlərindən biri kimi müəyyən edib, bu istiqamətdə ardıcıl və sistemli işlər həyata keçirilir. Onun sözlərinə görə, dövlət başçısı cənab İlham Əliyevin və Birinci vitse-prezident Mehriban xanım Əliyevanın şəhid ailələrinə xüsusi diqqət və qayğısı nəticəsində onların sosial müdafiə, mənzil təminatı, mənzil-kommunal şəraitinin yaxşılaşdırılması davamlı xarakter daşıyır.
Dövlət başçısı cənab İlham Əliyevin “Şəhid olmaq — xalqına, tarixə və gələcək nəsillərə misilsiz xidmət deməkdir” fikrini xatırladan icra başçısı bunun şəhid məfhumunun mahiyyətini, onun xalqımız üçün nə qədər müqəddəs olduğunu ən dəqiq şəkildə ifadə etdiyini vurğulayıb. Onun sözlərinə görə, şəhidlərin yerini heç kim doldura bilməz, lakin onların ailələrinin yanında olmaq, onların ruhuna ehtiram göstərmək bizim ən böyük vəzifəmizdir.
Sonra millət vəkilləri Anar İsgəndərov, Elçin Mirzəbəyli və digər natiqlər çıxış ediblər. Bildirilib ki, qəhrəman şəhidlərimiz öz canları bahasına torpaqlarımızı düşməndən azad etdilər, müstəqilliyimizi daha da möhkəmləndirdilər və Azərbaycan xalqının birliyi, iradəsi və gücünü bütün dünyaya nümayiş etdirdilər. Azərbaycanın bugünkü gücü, sabitliyi, azad və müstəqil yaşamaq haqqı məhz şəhidlərimizin misilsiz fədakarlığı hesabınadır. Onlar canlarından keçərək bir daha sübut etdilər ki, Azərbaycan xalqı heç vaxt əyilməz, heç vaxt haqqından dönməz.
Daha sonra şəhid atası Kamran Kazımov çıxış edib. Şəhid atası cənab Prezident İlham Əliyevin və Birinci vitse-prezident Mehriban xanım Əliyevanın tapşırıq və göstərişlərinə uyğun olaraq tam şəkildə dövlətin qayğısı ilə əhatə olunduqlarını, bütün müraciətlərinə diqqət və həssaslıqla yanaşıldığını vurğulayıb, buna görə onlara təşəkkürünü ifadə edib.
Çıxışlardan sonra məktəblilərin ifasında şəhidlərimizə həsr olunan şeirlər və musiqilər səsləndirilib.
Daha sonra tədbir iştirakçıları şəhidin Yuxarı Nüvədi kənd qəbiristanlığındakı qəbrini ziyarət edib və şəhidin adını daşıyan parka baxış keçiriblər.
Allah rəhmət eləsin!