Azərbaycan xalqının milli yaddaşında elə tarixlər var ki, həmin günlər təqvimdəki adi bir tarix olmaqdan çıxaraq xalqın taleyinin, mübarizəsinin və gələcəyinin mühüm səhifəsinə çevrilir. 27 Sentyabr da məhz belə tarixlərdəndir. Bu gün Azərbaycan xalqı Vətən müharibəsinin başlanğıcını, torpaqlarımızın azadlığı uğrunda canından keçən qəhrəman övladlarımızı və onların əmanət qoyduğu müqəddəs Vətən anlayışını böyük ehtiramla xatırlayır.
27 Sentyabr 2020-ci il Azərbaycan tarixində yeni bir mərhələnin başlanğıcı oldu. Həmin gün Azərbaycan Ordusunun həyata keçirdiyi əks-hücum əməliyyatları 44 günlük Vətən müharibəsinin başlanmasına səbəb oldu. Bu müharibə Azərbaycan xalqının illər ərzində ürəyində daşıdığı torpaq həsrətinin sona çatması istiqamətində mühüm tarixi hadisəyə çevrildi.
Lakin 27 Sentyabrın mənası yalnız hərbi əməliyyatların başlanması ilə məhdudlaşmır. Bu tarix xalqımızın sarsılmaz iradəsini, milli həmrəyliyini və Vətən qarşısında məsuliyyət hissini nümayiş etdirdiyi gün kimi də xüsusi əhəmiyyət daşıyır. Həmin günlərdə Azərbaycan cəmiyyətinin bütün təbəqələri bir amal ətrafında birləşdi. Cəbhədə döyüşən əsgər və zabitlərimizin yanında bütün xalq mənəvi cəhətdən səfərbər oldu.
Azərbaycan dövlətçiliyinin möhkəm təməllərinin formalaşmasında Ulu Öndər Heydər Əliyevin müstəsna xidmətləri vardır. Ulu Öndərin Azərbaycan rəhbərliyində olduğu illərdə dövlətçilik ənənələrinin möhkəmləndirilməsi, milli ordunun yaradılması, ölkənin iqtisadi potensialının artırılması və milli birlik ideyasının gücləndirilməsi istiqamətində mühüm addımlar atıldı.
Heydər Əliyev siyasi kursunun əsas istiqamətlərindən biri güclü və müstəqil Azərbaycan dövlətinin qurulması idi. Ulu Öndərin müəyyən etdiyi inkişaf strategiyası sonrakı illərdə ölkəmizin siyasi, iqtisadi və hərbi imkanlarının genişlənməsi üçün mühüm zəmin yaratdı.
Bu dövlətçilik xətti Prezident, Müzəffər Ali Baş Komandan cənab İlham Əliyevin rəhbərliyi ilə yeni mərhələdə davam etdirildi. Ölkənin müdafiə potensialının gücləndirilməsi, ordunun müasir standartlara uyğun qurulması, hərbi qulluqçuların peşəkarlığının artırılması və Azərbaycanın beynəlxalq mövqelərinin möhkəmləndirilməsi istiqamətində görülən işlər 2020-ci ilin tarixi hadisələrində öz əksini tapdı.
Vətən müharibəsi Azərbaycan əsgərinin döyüş ruhunu, xalqımızın birliyini və dövlətimizin iradəsini bütün dünyaya nümayiş etdirdi. 44 gün davam edən hərbi əməliyyatlar nəticəsində Azərbaycan Ordusu böyük tarixi qələbə qazandı. Bu qələbənin arxasında isə hər birimizin yaddaşında əbədi yaşayacaq şəhidlərimizin müqəddəs fədakarlığı dayanır.
Şəhidlər bizim üçün yalnız keçmişin qəhrəmanları deyil. Onlar Azərbaycanın bu gününün və gələcəyinin mənəvi sütunlarından biridir. Onların göstərdiyi şücaət gənc nəsildə Vətənə bağlılıq, milli dəyərlərə hörmət və dövlətçilik ruhunun formalaşmasına mühüm təsir göstərir.
27 Sentyabrın Anım Günü kimi qeyd olunması şəhidlərimizin xatirəsinə dövlət və xalq səviyyəsində göstərilən böyük ehtiramın ifadəsidir. Bu gün ölkəmizin hər yerində şəhidlərimizin əziz xatirəsi yad edilir, onların ailələrinə göstərilən diqqət və qayğı bir daha cəmiyyətin gündəminə gətirilir.
Şəhid ailələri və qazilər Azərbaycan cəmiyyətinin xüsusi ehtiram göstərdiyi insanlardır. Çünki onların həyatında Vətən anlayışı sözlə deyil, fədakarlıqla, sədaqətlə və böyük itkilərlə ifadə olunub. Şəhid ailələrinin qayğıları ilə maraqlanmaq, qazilərimizə diqqət göstərmək və onların sosial rifahının təmin edilməsinə töhfə vermək hər birimizin mənəvi məsuliyyətidir.
27 Sentyabr bizə həm də bir həqiqəti xatırladır: dövlətçilik yalnız müəyyən tarixi hadisələrlə deyil, nəsillərin davamlı səyləri ilə qorunur. Güclü dövlət üçün milli birlik, vətəndaş həmrəyliyi, qanunlara hörmət və Vətən sevgisi mühüm dəyərlərdir.
Bu gün Azərbaycan öz tarixinin ən şərəfli səhifələrindən birini yaşayır. Qarabağ və Şərqi Zəngəzurda aparılan genişmiqyaslı bərpa və quruculuq işləri şəhidlərimizin uğrunda can verdiyi torpaqlarda həyatın yenidən canlanmasını nümayiş etdirir. Yeni yollar, yaşayış məntəqələri, məktəblər, xəstəxanalar və digər infrastruktur layihələri həmin ərazilərin gələcək inkişafına xidmət edir.
27 Sentyabrı xatırlamaq həm də şəhidlərimizin bizə əmanət etdiyi Vətəni qorumaq, Azərbaycan dövlətinin müstəqilliyini və suverenliyini gələcək nəsillərə layiqincə ötürmək deməkdir.
Bu əlamətdar gündə Vətən müharibəsində həyatını itirən bütün şəhidlərimizin əziz xatirəsini dərin ehtiramla yad edirik. Onların ailələrinə səbir, qazilərimizə möhkəm cansağlığı arzulayırıq.
Ulu Öndər Heydər Əliyevin dövlətçilik irsi, Prezident, Müzəffər Ali Baş Komandan cənab İlham Əliyevin rəhbərliyi ilə həyata keçirilən siyasət və Azərbaycan xalqının sarsılmaz həmrəyliyi tariximizin bu mühüm səhifəsində öz izini qoyub.
27 Sentyabr – şəhidlərimizi ehtiramla andığımız, onların müqəddəs xatirəsi qarşısında baş əydiyimiz gündür. Şəhidlərimizin adı və Vətən uğrunda göstərdikləri qəhrəmanlıq Azərbaycan xalqının yaddaşında əbədi yaşayacaq.