“Xezertv.info” xəbər verir ki, Müqəddəs Ramazan ayı münasibətilə Azərbaycan Neft və Qaz Sənayesi İşçiləri Həmkarlar İttifaqı Respublika Komitəsinin təşkilatçılığı ilə şəhid ailələri, qazilər, Qarabağ müharibəsi və Əfqanıstan müharibəsi iştirakçıları üçün iftar süfrəsi təşkil olunub. Tədbir “Shirvan Operating Company Ltd” şirkətinin Azərbaycan Respublikasındakı filialı, Kayman adalarının “Karasu Operating Company LTD” şirkətinin filialı, “Salyan Oil” əməliyyat şirkəti və “Neftçala Operating Company LTD” şirkətinin dəstəyi ilə keçirilib.
İftar süfrəsində şəhid ailələrinin üzvləri, qazilər, müharibə iştirakçıları və digər qonaqlar iştirak ediblər. Tədbirin məqsədi müqəddəs Ramazan ayının mənəvi dəyərlərini bölüşmək, Vətən uğrunda canından keçmiş şəhidlərin ailələrinə və qazilərə ehtiram göstərmək, həmçinin cəmiyyətimizdə birlik və həmrəyliyi daha da möhkəmləndirmək olub.
Tədbirdə çıxış edən “Shirvan Operating Company LTD” şirkətinin Həmkarlar İttifaqı Komitəsinin sədri Məmmədov Taleh Mirkərəm oğlu Ramazan ayının mərhəmət, paylaşma və mənəvi saflaşma ayı olduğunu qeyd edib. O bildirib ki, bu müqəddəs ay insanları xeyirxahlığa, yardımlaşmaya və həmrəyliyə çağırır.
Taleh Məmmədov çıxışında vurğulayıb ki, şəhidlərimizin qəhrəmanlığı sayəsində Azərbaycan xalqı bu gün qalib xalq kimi yaşayır. Onların müqəddəs xatirəsi xalqımızın qəlbində daim yaşayacaq və gələcək nəsillər üçün örnək olacaqdır. O, şəhid ailələrinin və qazilərin hər zaman dövlətin və cəmiyyətin diqqət mərkəzində olduğunu qeyd edərək belə tədbirlərin mənəvi dəyərini xüsusi vurğulayıb.
Həmçinin bildirilib ki, Azərbaycan Həmkarlar İttifaqları Konfederasiyası və Azərbaycan Neft və Qaz Sənayesi İşçiləri Həmkarlar İttifaqı Respublika Komitəsi öz fəaliyyətində şəhid ailələrinə və qazilərə sosial və mənəvi dəstəyin göstərilməsinə xüsusi önəm verir.
Tədbirin sonunda ölkəmizin rifahı və sabitliyi üçün dualar edilib, şəhidlərin ruhuna rəhmət dilənib, qazilərə möhkəm can sağlığı və uzun ömür arzulanıb. Ramazan ayının bütün ocaqlara xeyir-bərəkət gətirməsi dilənib.

“Azərbaycan Neft və Qaz Sənayesi İşçiləri Həmkarlar İttifaqı Respublika Komitəsi tərəfindən Ramazan ayı münasibətilə “Shirvan Operating Company Ltd” Şirkətinin Azərbaycan Respublikasındakı Filialı, Kayman adalarının "Karasu Operating Company LTD" Şirkətinin filialı, “Salyan Oil” əməliyyat şirkəti, Neftçala Orerating Company LTD Şirkətindən Şəhid ailələri, Qazilər, Qarabağ müharibəsi və Əfqanıstan müharibəsi iştirakçıları üçün “İftar süfrəsi” təşkil edildi.
“Shirvan Operating Company LTD” şirkətinin Həmkarlar İttifaqı Komitəsinin sədri Məmmədov Taleh Mirkərəm oğlunun çıxışı:
Hörmətli şəhid ailələrinin üzvləri, Əziz qazilərimiz və Qarabağ müharibəsi iştirakçıları, Dəyərli qonaqlar, hörmətli tədbir iştirakçıları!
Sizi müqəddəs Ramazan ayı münasibətilə Azərbaycan Neft və Qaz Sənayesi İşçiləri Həmkarlar İttifaqı Respublika Komitəsi tərəfindən təşkil olunmuş bu mənalı və dəyərli iftar süfrəsində səmimi qəlbdən salamlayır, hər birinizə dərin hörmət və ehtiramımı bildirirəm.
Ramazan ayı müsəlman aləmi üçün ən müqəddəs aylardan biridir. Bu ay mərhəmətin, bağışlamağın, mənəvi saflaşmanın və xeyirxahlığın təcəssümüdür. Ramazan ayı insanları bir-birinə daha yaxın olmağa, ehtiyacı olanlara yardım etməyə, paylaşmağı və həmrəyliyi gücləndirməyə çağırır. Bu müqəddəs ayın ruhu insanları yalnız ibadətə deyil, həm də mənəvi dəyərləri yaşatmağa, bir-birinə dayaq olmağa səsləyir.
Bu gün burada təşkil olunan iftar süfrəsi də məhz bu ali dəyərlərin ifadəsidir. Bu tədbirin ən böyük mənası isə ondan ibarətdir ki, biz bu müqəddəs axşamda Vətən uğrunda ən böyük fədakarlığı göstərmiş qəhrəmanlarımızın ailələri ilə, qazilərimizlə və Qarabağ müharibəsi iştirakçıları ilə bir araya gəlmişik. Sizinlə eyni süfrə ətrafında olmaq bizim üçün böyük şərəf və qürur mənbəyidir.
Azərbaycan xalqı hər zaman öz qəhrəmanlarını yüksək dəyərləndirib. Tarixin bütün dövrlərində xalqımız Vətənin azadlığı və müstəqilliyi uğrunda böyük sınaqlardan keçib. Bu şərəfli tarixdə şəhidlərimizin adı qızıl hərflərlə yazılıb. Onlar canlarını Vətənə qurban verərək xalqımızın qürur və şərəf salnaməsini yazıblar.
Şəhidlərimizin qəhrəmanlığı sayəsində bu gün Azərbaycan xalqı başıuca, qalib xalq kimi yaşayır. Onların müqəddəs xatirəsi hər zaman xalqımızın qəlbində yaşayacaq və gələcək nəsillər üçün əbədi örnək olacaqdır.
Əziz şəhid ailələri! Sizlər yalnız qəhrəman övladlar böyütməmişiniz, sizlər Vətən üçün canından keçən igidlərin ailəsi kimi Azərbaycan tarixində xüsusi və şərəfli bir yer tutursunuz. Şəhid ailələri xalqımızın qürur yeridir. Sizin dözümünüz, səbriniz və Vətən sevgisi hər birimiz üçün böyük bir nümunədir. Bu gün burada sizinlə birlikdə olmaq, sizə hörmət və ehtiramımızı ifadə etmək bizim üçün həm mənəvi borc, həm də böyük şərəfdir.
Hörmətli qazilərimiz və Qarabağ müharibəsi iştirakçıları! Sizlər Azərbaycan torpaqlarının azadlığı uğrunda böyük şücaət və qəhrəmanlıq göstərmiş insanlarsınız. Döyüş meydanında göstərdiyiniz igidlik, Vətənə olan sonsuz sədaqətiniz Azərbaycan tarixinin ən şanlı səhifələrindən birini yazdı. Sizin qəhrəmanlığınız sayəsində bu gün Azərbaycan bayrağı azad Qarabağ torpaqlarında qürurla dalğalanır.
Bu qələbə yalnız hərbi zəfər deyil, həm də milli birlik və həmrəyliyin, güclü dövlətin və yenilməz xalqın qələbəsidir. Azərbaycan xalqı bu qəhrəmanlığı heç zaman unutmayacaq və sizə olan hörmət və ehtiramı daim qoruyacaqdır.
Bu gün ölkəmizdə şəhid ailələrinə və qazilərə dövlət səviyyəsində böyük diqqət və qayğı göstərilir. Azərbaycan Həmkarlar İttifaqları Konfederasiyası və Azərbaycan Neft və Qaz Sənayesi İşçiləri Həmkarlar İttifaqı Respublika Komitəsi də öz fəaliyyətində bu məsələlərə xüsusi önəm verir. Həmkarlar ittifaqı hər zaman şəhid ailələrinin, qazilərin və müharibə iştirakçılarının yanında olmağa, onların sosial rifahına və mənəvi dəstəyinə töhfə verməyə çalışır. Bu gün təşkil olunan iftar süfrəsi də məhz bu diqqət və ehtiramın bir ifadəsidir.
Əminik ki, belə görüşlər cəmiyyətimizdə birlik və həmrəyliyin daha da möhkəmlənməsinə xidmət edir. Çünki Vətən uğrunda canını fəda edənlərin xatirəsini yaşatmaq, onların ailələrinə diqqət və qayğı göstərmək hər birimizin mənəvi borcudur.
Azərbaycan neftçisi tarix boyu ölkəmizin inkişafının, iqtisadi gücünün və müstəqilliyinin əsas dayaqlarından biri olmuşdur. Neftçilərimizin zəhməti sayəsində Azərbaycan dünya enerji xəritəsində mühüm yer tutan bir ölkəyə çevrilmişdir. Neftçi peşəsi sadəcə bir iş deyil bu, böyük məsuliyyət, böyük fədakarlıq və böyük iradə tələb edən bir peşədir. Qarlı-şaxtalı günlərdə, qızmar istidə, dənizin qoynunda, ucqar yataqlarda çalışan neftçilər gecə-gündüz demədən Vətənə xidmət edirlər. Onların zəhməti sayəsində ölkəmizin iqtisadiyyatı möhkəmlənir, xalqımızın rifahı yüksəlir.
Neftçilər həm də hər zaman vətənpərvərlik nümunəsi göstərmiş insanlardır. Azərbaycan tarixinin müxtəlif dövrlərində neftçilərimiz təkcə əmək cəbhəsində deyil, həm də Vətənin müdafiəsində ön sıralarda olublar. Qarabağ müharibəsində də neft sənayesində çalışan çoxsaylı igidlər Vətən uğrunda döyüşərək qəhrəmanlıq göstərmiş, bəziləri isə şəhidlik zirvəsinə ucalmışdır.
Əziz qonaqlar! Bu müqəddəs Ramazan axşamında Uca Allahdan diləyimiz budur ki, ölkəmizə daim sülh, sabitlik və firavanlıq nəsib etsin. Allah şəhidlərimizə rəhmət eləsin, onların ruhu qarşısında baş əyirik. Qazilərimizə möhkəm can sağlığı, uzun ömür və ailə səadəti arzulayırıq.
Bu müqəddəs Ramazan ayı hər bir ocağa ruzi-bərəkət, xeyirxahlıq və mərhəmət gətirsin. Uca Allah dövlətimizi və xalqımızı qorusun, Vətənimizi daim güclü və qalib etsin.”

Məmmədov Taleh Mirkərəm oğlu
"Shirvan Operating Company LTD" Şirkətinin Həmkarlar İttifaqı Komitəsinin sədri


Fərid Faiqoğlu
Xezertv-nin Baş redaktoru
Azərbaycan Jurnalistlər Birliyinin üzvü